శ్రీరామదూత (కైతికాలు)సుబ్బా జ్యోత్స్న -మంచిర్యాల.

అసమాన బలాఢ్యుడె

వానరాధీశుడు

అపర పరాక్రమవంతుడె

అంజనీ పుత్రుడు

భళారే!శ్రీ ఆంజనేయా

సరిలేరు నీకెవ్వరూ

ఫలముగా భావించి 

భానుడిని మింగబోయెను

ఆ వాయుదేవుని అంశ

మృత్యుంజయుడై నిలిచెను

వారెవ్వా!వాయునందనా

నీ పరాక్రమం అమోఘమే..

తన ఘనత తానెరుగని

మహోత్కృష్ట వీరుడు

అవలీలగా కడలిని

లంఘించిన శూరుడతడు

భళారే !భజరంగబళీ

నీ తేజం అద్వితీయం..

జలధిని సులువుగా దాటి

లంకా నగరం చేరెను

అశోక వనమునందున

సీత జాడ కనిపెట్టెను

ఓహో!అతులిత బలధామా

మహోన్నత మూర్తి నీవే

శోకమునున్న ధరణిజకు

రామాంగుళికం చూపెను

తన మధుర వచనాలతో

ధైర్యమును కలిగించెను

వారెవ్వా!కపివరేణ్యా

నీ ప్రతిభ అనన్య సామాన్యం 

తన వాలము తోడను 

లంకను దహించి వేసెను

శ్రీ రాముని దూతగా

రావణుని హెచ్చరించెను

వారెవ్వా!శ్రీ హనుమంతా

కార్యసాధనలో శూరుడవు.. 

హృదయమున రాముని చూపి

తన భక్తిని చాటినాడు 

స్వామిని ప్రీతితో కొలిచి

ప్రియ భక్తుడై నిలిచిండు

ఓహో!మహాదివ్యకాయా..

నీ భక్తులే ఈ జగమంతా..