ఎదురుచూస్తున్నా!;-గుండ్లపల్లి రాజేంద్రప్రసాద్, భాగ్యనగరం

కలలో కనిపించిన పువ్వుపైన

కవిత చూపించిన పువ్వుపైన

కల్పన చేయాలనుకుంటున్న పువ్వుపైన

కమ్మనికవితను వ్రాయలనుకుంటున్నా 

ఎవరూ చూడని ఊహించని

ఎదనుతట్టే పువ్వునుగూర్చి

ఎందరిచేతనో వ్రాసిచదివించాలని

ఎన్నోరోజులనుండో ఎదురుచూస్తున్నా

అందమైన పువ్వది

ఆనందమిచ్చే పువ్వది

అద్వితీయమైన పువ్వది

ఆకర్షించే పువ్వది

క్రితం కనిపించనటువంటి

క్రొత్తరకం రంగులపువ్వది

కవితలకు ఎక్కించవలసిన

కమ్మని కలికాలంపువ్వది

మా ఇంటిలోనికిరమ్మని

మర్యాదచేస్తానని

మనసులో నిలిచిపొమ్మని

మాట్లాడలేకపోతున్నా

ఆ పువ్వు

చిక్కటంలేదు

దొరకటంలేదు

ఒకటే ఊరిస్తుంది

పిలిస్తే

ప్రక్కకువస్తుందోలేదో

పలకరిస్తే

ప్రతిస్పందిస్తుందోలేదో

ఆపువ్వు 

మాట్లాడుతుంది

మత్తెక్కిస్తుంది

మనసునుదోచుకుంటుంది

ముస్తాబవుతున్నా

మనసుకు పదునుపెడుతున్నా

మంచిమాటలు సిధ్ధంచేసుకుంటున్నా

మా ఇంటికి తనంతతానుగా రప్పించాలనిచూస్తున్నా

సొగసరి పువ్వది

సుగంధాల పువ్వది

సుమధురాల పువ్వది

సురలోకపు పువ్వది

సమయం ఆసన్నంకాలా

సందర్భం రాలా

ఏవేవో ఊహలు పుట్టిస్తుంది

ఎద ఏదోవ్రాయాలని తపిస్తుంది

అప్పుడు ఆసమయాన

అందరికి అందిస్తా

అద్భుతమైనకవితను

అప్పటివరకు వేచిచూడమని కోరుతున్నా