మంటలనార్పేదెవరో?;-గుండ్లపల్లి రాజేంద్రప్రసాద్, భాగ్యనగరం

చలికాలముపోయి వసంతమాసమొచ్చి

సిరిమల్లెలుపూసి కోయలలుకూస్తుంటే

ప్రకృతిపచ్చదనంకప్పుకొని పరవశింపజేస్తుంటే

పాడుచేస్తున్నారని సూరీడు ఎండలుమండిస్తున్నాడు

చక్కదనంతో

చల్లదనంతో

చాలామంది ప్రేమికులలో

చంద్రుడు మంటలులేపుతున్నాడు

మేనులో మంటలులేస్తున్నాయి

మదిలో మంటలులేస్తున్నాయి

పరిసరాలలో మంటలులేస్తున్నాయి

ప్రజలలో మంటలులేస్తున్నాయి

పరువుహత్యల వార్తలువిని

పిల్లలనెత్తుకొనివెళ్ళి చంపుతున్నారని

పడతులపై మానభంగాలుజరుగుతున్నాయని

ప్రజలలో ఆగ్రహమంటలు ప్రజ్వరిల్లుతున్నాయి

కానిపనులుచేసే

కుసంస్కారులనుచూస్తే

కర్కశులనుకంటే

కడుపు మండుతుంది

వంచనలుచేసే

వక్రమార్గాననడిచే

విమతులనుచూస్తే

వళ్ళు మండుతుంది

పచ్చని కాపురాలమధ్య

చిచ్చుపెట్టే శూర్పణకలనుచూస్తే

కుటుంబాలను కూల్చేఘనులనుచూస్తే

కళ్ళు మండుతున్నాయి

నమ్మకంగా మాట్లాడి

నట్టేటిలో ముంచే

నయవంచకులను చూస్తే

నా ఎద మండిపోతుంది

ప్రేమలోదించి

ఆశలుకలిగించి

మోసంచేసేవారినిచూస్తే

గుండె మండిపోతుంది

అన్యాయాలుచేసి

అవినీతికిపాల్పడి

అక్రమాస్తులు అర్జించేవారినిచూస్తే

అరికాళ్ళు మండుతున్నాయి

ఆ మంటలను

ఆర్పేదెవరో

సమాజాన్ని

బాగుపరచేదెవరో