ప్రజలబాగు కోసమే ;- డా.గౌరవరాజు సతీష్ కుమార్.

జలజల జలజల వానలుకురిసిన 

గజగజ గజగజ చలి వణికించిన 

భగభగ భగభగ ఎండలు మండిన 

జనులందరికీ కడుపునింపగా 

ప్రకృతితోనే మమేకమయ్యి

కృషీవలుడినై శ్రమనే చేస్తా ! 

వెన్నముద్దకు సుద్దులు చెప్పి 

పాటలు నేర్పి ఆటలు నేర్పి 

పాఠాల్ చెప్పి నడవడికను నేర్పి 

మనిషిగ మలిచే గురువును నేను ! 

లారీ అయినా క్వారీ అయినా 

మట్టిలొ అయినా ఇసుకలొ అయినా 

కర్మాగారం ఏదయినాసరె

నిరంతరం నే పరిశ్రమించే శ్రామికుడనేగా !

దేహముకొచ్చిన కష్టమేదైనా

మాటలతోనీ మందులతోనీ

అవసరమైతే శస్త్రాలతోనీ 

చికిత్స చేసి అనారోగ్యమును పోగొట్టి

"వైద్యో నారాయణో హరిః"

అని నేను అనిపించుకుంటా !

ఇల్లేదైనా మేడేదైనా 

వెళ్ళేందుకు ఏదారేదైనా 

నదులు వాగుల వంతెనలైనా

నీటిని దిగువకు డ్యామేదయినా

భూమిపైని ఏ కట్టడమైనా

ఆలోచించి పథకం వేసి 

నిర్మించేసే ఇంజనీరుని నేనేగా !

ఎండావానా చలి ఏదయినా 

కొండా కోనా సముద్రమయినా 

మాతృభూమిని కబళింపజూసే

శత్రుమూకను దునుమాడేసే

వీరసైనికుడను నేనేగా!

ఎవరు ఏపనిచేసినా 

ఎవరు ఎంత కష్టపడినా 

రకరకాల వృత్తులన్నీ

ప్రజల బాగు కోసమేగా !!