కాళోజీ సమ్మోహనాలు ;-ఎం. వి. ఉమాదేవి. బాసర

(ముక్తపదగ్రస్తం )

ఖలేజా కాళన్న 

కాళ రుద్రుడయెన్న 

రుద్రుడే ప్రజలకోసంగాను ఓ వనజ !

సంచిలో సమస్యలు 

సమస్యల జవాబులు 

జవాబుగ తానయ్యి పనిచేసె ఓ వనజ !

తానౌ కార్యశీలి 

కార్యాలయం మజిలి 

మజిలీతొ మనకొరకు ప్రశ్నిoచె ఓ వనజ !

ఏ భాషరా నీది 

నీ వేష మేమిటిది 

ఏమిటని గర్జించి చావుమనె ఓ వనజ !

అమ్మభాషను పలుకు 

ఆంగ్లమేల కులుకు 

కులుకులే మానుమని కోపించె ఓ వనజ !

ఉద్యమం తనబాట 

బాటలో ప్రతి పూట 

పూటపూటకు బైట తిరిగేను ఓ వనజ !

తెలంగాణా బిడ్డ 

బిడ్డ పోరుకి అడ్డ 

అడ్డాగ తనకలం యోగించి ఓ వనజ !

సామాన్య వేషమ్ము 

వేషమున రోషమ్ము 

రోషంతొ ప్రశ్నలను సంధించు ఓ వనజ !

నిజాం నాటిది పోరు 

పోరు మహ సలిపేరు 

సలుపునే సమస్యల కోసమే ఓ వనజ !

పురస్కారం కోట 

కోట వినయం నోట

నోటనే తెలగాణ యాసలే ఓ వనజ !

కాళన్న యాదిలో 

యాదిమరి గాథలో 

గాథతానై నిలిచే తన  గొడవ ఓ వనజ !