సునంద భాషితం ;- వురిమళ్ల సునంద, ఖమ్మం

 న్యాయాలు-33
కాకతాళీయ న్యాయము
*****
కాకము అంటే కాకి. తాళము లేదా తాలః అంటే తాడి చెట్టు/ తాటి చెట్టు.
కాకి తాటి చెట్టు మీద వాలగానే అనుకోకుండా తాటిపండు రాలి పడటాన్ని కాకతాళీయం అంటారు.
కాకి  వాలడం వల్ల తాటిపండు రాల లేదు. కాకికి ఆ తాటిపండును రాల్చేయాలనే ఆలోచనా లేదు.కాకి అటూ ఇటూ ఎగురుతూ వచ్చి  తాటి చెట్టు మీద వాలడం.
సరిగ్గా ఆ సమయంలో తొడిమ ఊడి పండు రాలే సమయం ఆసన్నం కావడంతో చటుక్కున అది రాలి కింద పడటం జరిగింది.
ఆ సమయంలో అటుగా వెళ్తున్న ఓ వ్యక్తికి ఈ సంఘటన వల్ల తాటి పండు లభిస్తుంది. కాకి తనకోసమే దానిని పడవేసిందేమో అనుకుని ఆనంద పడతాడు. కానీ కాదు కదా!
ఈ విధంగా రెండు సంఘటనలు ఓకే సారి ఏక కాలంలో జరగడం విశేషం. ఇలా ఒకదానితో ఒకటి పొంతనలేని సంఘటనలు జరిగి వాటిమధ్య ఓ సంబంధాన్ని ఏర్పరడడాన్ని కాకతాళీయ న్యాయము అంటారు.
అప్పుడప్పుడు మన జీవితంలో అనుకోని సంఘటనలు మంచివో,చెడువో జరుగుతూ ఉంటాయి. అయితే వాటిని ఆయా వ్యక్తులకు ఆపాదిస్తూ ఉంటాం.కానీ తర్వాత తెలుస్తుంది కాకతాళీయంగా జరిగాయని.
అనుకోకుండా కొన్ని మంచి సంఘటనలు జరిగినప్పుడు కొందరు వ్యక్తులు ఆ సమయంలో అక్కడ ఉండటం జరుగుతుంది.అది కాకతాళీయంగా జరిగినా తమ వల్లే,తమ గొప్పే అని చెప్పుకోవడం, వాటిని నిజమే అనుకోవడం కూడా చూస్తూ ఉంటాం.
 ఇలాంటి విషయాలకు కాకతాళీయ న్యాయమును ఉదాహరణగా చెబుతుంటారు.
ప్రభాత కిరణాల నమస్సులతో 🙏