విశ్వనాధ్ కాశీ నాథుని విశ్వనాధులు;-బృంద

తెలుగుదనం ఉట్టిపడే

మన నట్టింట జరిగే

మన ఆత్మబంధువుల 

జీవిత చిత్రంలా

అనిపించే సినిమాలకు

చిరునామా...

నటించడం మరచి

పాత్రలో జీవించడం

అనేది అందరికీ అర్థమయేలా

చేసిన దర్శకత్వ శైలి.

మరుగున పడిపోయిన

శాస్త్రీయ  సంగీత నాట్యాలకు

ఊపిరి పోసిన

అచ్చతెనుగు మనసు.

సినిమాల వల్ల మార్పొస్తుందా

అన్న ప్రశ్నలకు 

జవాబుగా వేలాదిమంది

తమ పిల్లలకు సంగీతం

నేర్పించిన 

ఉత్తమ సమాధానం

వారి అధ్భుత అభిరుచి.

సినిమా పాటలు వినలేని

పరిస్థితి  వచ్చిన ఒకానొక

పరిస్థితి లో

పాటలు ఇలా కూడా వుంటాయి.

అని ప్రతి ఇంటా మారుమోగేలా

చేసిన అత్యుత్తమ విలువలున్న

సాహితీ అభిలాష.

సునిశిత హాస్యంలో 

మరచిపోలేని  సంభాషణలు

చిన్ని చిన్ని దృశ్యాలతో

చాలా పెద్ద సందేశాలు

మాటలే లేకుండా మౌనంగా

నటింపచేసి గొప్ప

విషయాలను మనసులను

తెరపై ఆవిష్కరించిన

అద్భుత ప్రతిభ

మంచిని 

సున్నితమైన శృంగారాలను

చతురమైన సంభాషణలను

అనిర్వచనీయమైన అభిమానాలను

అందరూ ఆమోదించేలా

అందరూ అభినందించేలా

తెరపై ఆవిష్కరించడం

వారి సినిమాలు చూడడమే

ఒక ఉత్తమాభిరుచి అని

సామాన్యులు అనుకునేంత

గొప్పగా కథను అల్లుకునే

సామర్థ్యం.

మధ్యతరగతి మనసులోని

కోరికలు....

చిరు కలహాలు

చిన్నిచిన్ని  విషయాలు

అందంగా చూపించి

హాయిగా నవ్వింవే దృశ్యాలు

సినిమా పాటకే

పట్టాభిషేకం చేసేలా

వారి సినిమా పాటలు

సిరిమువ్వలు మోగుతుండగా

శృతి లయల్లా

తలవంచి సప్తపది తిరుగుతున్న

కొత్త దంపతుల్లా

మనసును మురిపించి

స్వాతి కిరణాలు ప్రసరించే

శుభోదయాలను 

శుభప్రదంలా మలచి 

సిరివెన్నెల వెలుగుల్లోతడిపేసి

స్వాతిముత్యంలా  మనసును

మార్చేసి 

వారి చిత్రాల పాటలు..

కొందరికే సాధ్యమైన

విజయాలు వరించిన

తెలుగువారికి గర్వకారణమైన

కళా తపస్వి

తెలుగు సినీ కళామతల్లి

కిరీటంలో కోహినూర్ వజ్రం

మన 

కాశీనాధుని విశ్వనాధ్ గారు

సంపూర్ణ జీవితాన్ని

విజయవంతంగా జీవించి

వారిదైన ముద్రను

మనందరి మనసులో వేసి

రాబోయే తరాలకు

తెలుగు సంస్కృతి సంప్రదాయాలకు

ప్రతీకగా నిలిచే 

చిత్ర రాజాలను  సంపదగా

ఇచ్చి..

ఆ విశ్వనాధుని పాదపద్మాలు

చేరిన

స్వర్ణకమలానికి

నివాళులు

🌸🙏🌸