సుప్రభాత కవిత ; -బృంద

నిన్నటి నిరాశ పోవాలంటే

రేపటిపై ఆశ పెంచుకోవాలి

ఏ క్షణం ఏమవుతుందో

ఏ కబురు చల్లగా వస్తుందో

ఏ మాట ఎదురెరుగని

బాట అవుతుందో!

ఏ బాట ఏ తెలియని

విజయాలకు చేరువ చేస్తుందో!

ఏ విజయం ఏ శిఖరానికి

తొలిమెట్టవుతుందో!

ఏ మెట్టు మరో మజిలీకి

దారి చూపుతుందో?

ఏ మజిలీ  ఏ సుందర

స్వప్నం సాకారం చేస్తుందో!

ఏ స్వప్నం ఎదను నింపే

హాయిని ఇస్తుందో!

ఏ హాయి ఎంత మధుర

భావనలిస్తుందో!

ఏ  మధుర భావన మదిలో

వీణలు మోగేలా చేస్తుందో!

ఏ వీణ ఏ మౌనాన్ని

రాగంగా పలుకుతుందో

ఏ రాగం హృదయాన్ని

మెత్తగా స్పృశిస్తుందో

ఏ హృదయం ఏ ఉదయం

కోసం ఎదురు చూస్తోందో

ఆ అపూర్వమైన ఉదయాన్ని

ఆనందంగా స్వాగతిస్తూ

🌸🌸 సుప్రభాతం 🌸🌸