జాతీయ విద్యా విధానం 2020; -సి.హెచ్.సాయిప్రతాప్

 కేంద్ర క్యాబినెట్ 2020  సంవత్సరంలో  ఉన్నత విద్యలో సంస్కరణలు అమలు చేస్తూ 'నూతన విద్యా విధానం-2020'కి ఆమోదం తెలిపింది.
దీంతో పాటు కేంద్ర మానవ వనరుల మంత్రిత్వ శాఖ పేరును కేంద్ర విద్యా శాఖగా మార్చారు. ఈ మార్పులను సూచించిన కమిటీకి మాజీ ఇస్రో చీఫ్ కె కస్తూరి రంగన్ నేతృత్వం వహించారు. ఈ నూతన జాతీయ విద్యా విధానం అమలులోకి వస్తే విద్యార్ధులకు ఒత్తిడి లేని చదువులు సాధ్యం అవుతుంది.
కొత్త విధానం పాఠశాల, ఉన్నత విద్యా రంగంలో పెద్ద ఎత్తున సంస్కరణలకు బాటలు వేయనుంది. అందరికీ సమాన విద్యా అవకాశాలు, అందుబాటులో విద్య, త్రిభాషా సూత్రం అమలు, మాతృభాషలో సాంకేతిక విద్యాబోధన లాంటి విప్లవాత్మక మార్పులు రాబోతున్నాయి.  
ఇందులో ముఖ్యమైన అంశం నూతన పరీక్షా విధానం. అయిదవ తరగతి వరకు మాతృ భాషలోనే పాఠాలు నేర్పిస్తారు. బోర్డు పరీక్షలు విద్యార్థి సముపార్జించిన జ్ఞానాన్ని పరీక్షించే విధగా తీర్చి దిద్ది, మూస తరహా పరీక్షలకు స్వస్తి చెబుతారు. పిల్లల రిపోర్ట్ కార్డులలో కేవలం వివిధ సబ్జెక్టులలో వచ్చిన మార్కులు మాత్రమే కాకుండా వారి ఇతర నైపుణ్యాలకు కూడా మార్కులు ఇస్తారు. విద్యార్ధులకు తమకు నచ్చిన కోర్సులో చేరే లేక తమకు నచ్చిన సబ్జెక్టులను ఎంచుకునే స్వేచ్చ ఇప్పుడు లభిస్తుంది.

విద్యా విధానాన్ని ఇప్పుడున్న 10 + 2 నుంచి 5+3+3+4 గా విభజిస్తారు. మొదటి అయిదు సంవత్సరాలలో ప్రీ ప్రైమరీ నుంచి రెండవ తరగతి వరకు ఉంటాయి. రెండవ దశలో మూడు నుంచి అయిదవ తరగతి, తర్వాత దశలో ఆరు నుంచి ఎనిమిదవ తరగతులు, చివరి నాలుగు సంవత్సరాలలో తొమ్మిది నుంచి 12 వ తరగతి వరకు ఉంటాయి.స్థానిక భాష, ప్రాంతీయ భాషను బోధనా మాధ్యమంగా కనీసం 5వ తరగతి వరకు ఉంచాలని, 8వ తరగతి ఆ పై వరకు దీన్ని కొనసాగించవచ్చని కొత్త విద్యా విధానం చెబుతోంది. సంస్కృతంతోపాటు భారతదేశంలోని ఇతర ప్రాచీన భాషలు, సాహిత్యం కూడా విద్యార్థులు ఆప్షనల్సబ్జెక్టుగా ఎంచుకునే వీలు కల్పించింది.