సౌమ్య గుణము (పద్యములు);కాసుల ధీరాజ శర్మ, హైదరాబాద్,9440522864.

91.ఆ.వె.

లేత మనసు పిల్లలే మమతలు జల్లు

కపట బుద్ది లేక కనుల వెలుగు

ఆటలాడినటుల మాటలు గనిపించు

సౌమ్య గుణము విడక సాగవలయు!!

92.ఆ.వె.

వారి ధర్మ మెరిగి వారు నడువ వలె

నితర ధర్మ మందు నిలువ వొద్దు 

నీవు వెడలి చూడ నీకేమి కలుగును

సౌమ్య గుణము విడక సాగవలయు!!

93.ఆ.వె.

ఎవరి బాధ నైన యెవరు తీర్చగలరు 

ఎవరి పాప ఫలిత మెటులబోవు

పాప చింత మాని పాద సేవలు జేయు

సౌమ్య గుణము విడక సాగవలయు!!

94.ఆ.వె.

ధరణి మీద నుండు ధర్మదేవతలను

కొలిచి యాచరించు కోటి పుణ్య

కార్యములను జేయు కంకణధారివై

సౌమ్య గుణము విడక సాగవలయు!!

95.ఆ.వె.

పాద సేవ లోనె పరమార్థముందని

మనసు నందు తలచి మాట నిలుపు

సకల ప్రాణులందు సద్భావనకలిగి

సౌమ్య గుణము విడక సాగవలయు!!