శ్రీ బాలత్రిపురసుందరిదేవి;- టి. వి. యెల్. గాయత్రి.పూణే. మహారాష్ట్ర.

మత్తకోకిల.

బాలరూపిణి!భానుశోభిత!భద్ర!పంకజవాసినీ!

మూలశక్తివి విశ్వమేలెడి పుణ్యశాలిని!భక్తులన్

మేలుగా కనిపెట్టి కాతువు మీనలోచని!యంబికా!

దాలిమిన్ నను గాంచుమమ్మరొ!దైన్యవారిణి!చిన్మయీ!//

మత్తకోకిల.

అక్షమాల ధరించి భక్తుల నాదరింతువు బాలగన్

దక్షతన్ బరిమార్చి దైత్యులఁ దాసకోటిని బ్రోచిమా

కక్షరంబుల నిచ్చుతల్లి!కృపాంబుధీ!నిను వేడుచున్

దీక్షతోడ యజింతు నమ్మరొ!దేవవందిత భాగ్యదా!//

మత్తకోకిల.

శైలపుత్రిక!హైమ!పార్వతి!శంభురాణి!శుభాంగినీ!

కాలచక్రముఁ ద్రిప్పుచుందువు కాలరూపిణివైయుమా!

కాలుచుందుము జన్మలందున కాల్చివేయుమ!పాపముల్

జాలిచూపవె!శ్యామలా!నిను సన్నుతింతును భక్తిగన్.//

ధ్రువకోకిల.

త్రిపుర సుందరివై జగత్తును తీర్చిదిద్దెడి తల్లి!నీ

కృపను గోరితి పేదరాలను గేహమందున నిల్వుమా!

జపతపంబులఁ జేయబోవగ శక్తిలేదని తెల్పి నీ

సపరిచర్యలు జేసి కొల్తును సమ్మతించుమ!శాంకరీ!//