నమో దుర్గ!;- టి. వి. యెల్. గాయత్రి.పూణే. మహారాష్ట్ర.

ఉత్పల మాల /

1.

దుర్గ!యటంచునిన్ బిలువ దోసము లన్నియు తొల్గ చేసి స

న్మార్గము చూపు తల్లి!నినుమానస మందున దల్తుమమ్మరో!

నిర్గుణ సాధనల్ సలిపి నీపద సేవలు జేసి కొల్తుమో

భర్గుని రాణి!దక్షి!భవ పాప వినాశిని!లోక నాయకీ!/

చంపకమాల/

 2.

రుజములు చుట్టుముట్టగను రోగభయంబున లోకులెల్లరున్

గజగజలాడి నీదరికి గ్రక్కున వచ్చిరి కాంచు

మమ్మ!యీ

ప్రజలకు ధైర్యమిచ్చి రుజ బాధలు కాల్చుమ!సర్వమంగళా!

సుజనుల బ్రోచు తల్లి!శశి చూడధరీ!హిత కారిణీ యుమా!/

ఉత్పల మాల /

3.

రక్కసులందరిన్ దునిమి రౌద్రపు రూపున శక్తిశాలివై

దిక్కుల నేలు మా జనని!తీయని నవ్వులు చిల్కు చుండి మా 

బ్రక్కన తోడుగన్ నిలిచి బాధలు దూరము చేయు మమ్మ!నీ

చక్కని మోము గాంచగను సాధన సల్పెదమమ్మ శ్రీకరీ!/

చంపక మాల /

4.

కరములు మోడ్చి నీదరికి

కామిత సిద్ధికి జేరు భక్తులన్

మురియుచు చేరదీసి ముద్దుగ కోర్కెలు తీర్చుతల్లి!నీ

చరితము పాడుకొంచు మనసారగ మ్రొక్కెద మమ్మ శాంభవీ!

నిరతము నీదు సన్నిధిన నిల్చెడి భాగ్యము నీయుమీశ్వరీ!/

చంపక మాల /

5.

జగముల సృష్టి చేయు శివశక్తి!విమోహ విరాగ పూజితా!

నిగమనుతా!శుభప్రదవు నిత్యము భక్తుల బ్రోచుచున్ సదా 

ప్రగతిని చూపు తల్లి!సుర వందిత నిన్ను భజింతు మమ్మ!మా

వగలను దీర్చవమ్మ!హిమ వాసిని!భక్తవశంకరీ!జయా!/

-----------------------------