శ్రీ విష్ణు సహస్రనామాలు - (బాల పంచపది )- ఎం. వి. ఉమాదేవి

141)బ్రాజిష్ణుః -

అద్వయ ప్రకాశరూపం గలవాడు

బ్రహ్మాండాన భాసిల్లువాడు

విష్ణుస్థానము నందున్నవాడు

అంతయు వెలుగుచున్నవాడు 

శ్రీ విష్ణు సహస్రనామాలు ఉమా!

142)భోజనః -

భోజ్యరూపము అయినట్టివాడు

ఆహారమునందు ఉన్నవాడు

ప్రాణుల ఆకలి తీర్చుచున్నవాడు

కుక్షిని నింపుశక్తియున్నవాడు 

శ్రీ విష్ణు సహస్రనామాలు!ఉమా!

143)భోక్తాః -

ప్రకృతి ఆస్వాదన చేయువాడు

సర్వమును అనుభవించువాడు

సర్వభోక్తగా నిలిచియున్నవాడు

సంపూర్ణ అనుభవదారుడు

శ్రీ విష్ణు సహస్ర నామాలు ఉమా!

144)సహిష్ణుః -

అపరాధములు మన్నించువాడు

భక్తుల క్షమించుచున్నవాడు

అన్నిస్థితులనూ సహించువాడు

సంయమనము గలిగినవాడు 

శ్రీ విష్ణు సహస్ర నామాలు ఉమా!

145)జగదాదిజః -

సృష్టి ఆరంభముకు కారకుడు

ఆదినుండియు వున్నట్టివాడు

ఆరంభమున వ్యక్తమైనవాడు

మూలకారణము తానయినవాడు 

శ్రీ విష్ణు సహస్రనామాలు ఉమా!

(సశేషం )