శ్రీ విష్ణు సహస్రనామాలు (బాల పంచపది )ఎం. వి. ఉమాదేవి

531)మహర్షి-కపిలాచార్యః -

వేదవిధుడైనట్టి వాడు 

కపిలాచార్య రూపమున్నవాడు 

యోగశాస్త్రమునిచ్చినవాడు 

సాంఖ్యగ్రంథములకారకుడు 

శ్రీ విష్ణు సహస్ర నామాలు ఉమా!

532)కృతజ్ఞః -

సృష్టి, కర్త రెండూ తానయినవాడు 

నేర్పరియై యుండునట్టి వాడు 

తనవారిపై గురుతున్నవాడు 

సమూహమును మరువనివాడు 

శ్రీ విష్ణు సహస్రనామాలు ఉమా!

533)మేదినీపతిః -

ధరణికి భర్తగానున్నవాడు 

భూమిని రక్షణచేసినవాడు 

రాజ్యం పరిపాలన చేయువాడు 

విశ్వభారము మోయుచున్నవాడు 

శ్రీ విష్ణు సహస్రనామాలు ఉమా!

534)త్రిపద-

త్రిపాదాల విశ్వమును నిండువాడు 

వామనుడుగా వచ్చినట్టివాడు 

బలిగర్వమును అణిచినవాడు

అవతారశక్తి చూపించువాడు 

శ్రీ విష్ణు సహస్రనామాలు ఉమా!

535)త్రిదశాధ్యక్షః -

జీవావస్థలకు సాక్షి ఐనవాడు 

జాగృతిని కలిగించుచున్నవాడు 

స్వప్నములనీయగల వాడు 

సుషుప్తిలోన ముంచగలవాడు 

శ్రీవిష్ణు సహస్రనామాలు ఉమా!

(సశేషం )