తెలుగింటి ఇలవేల్పు ఎన్టీఆర్;- శిరందాస్ శ్రీనివాస్హైదరాబాద్-9441673339

సినీ వినీలాకాశంలో మెరిసిన ధ్రువ తారవు

నందమూరి వంశంలో జన్మించిన సితారవు

ఆ దేవుడి రూపం ఎలా ఉంటుందో తెలియదు కానీ 

పండిత పామరులకు రాముడూ నీవే కృష్ణుడూ నీవే..

ఆ దేవుడి దశావతారాలు నీవే..

అల్లూరియైనా, ఆంధ్ర భోజుడైనా అడవి రాముడు, అందాల రాముడు అయినా, 

జస్టిస్ చౌదరి అయినా.. 

నటించడం కాదు జీవించడం నీకే చెల్లు

సరి లేరు నీకెవ్వరు.. సరి రారు నీకెవ్వరు.

దాన వీర శూర కర్ణ..

త్రిపాత్రాభినయం కాదు

కథ, కథనం, దర్శకత్వం

అన్నీ నీవై నడిపించిన

నటించి మెప్పించిన

మేరునగధీరుడవు 

ఆబాల గోపాలాన్ని మెప్పించిన ఘటోత్కచుడవు

ఏ పాత్ర పోషించిన ఆ పాత్రలో లీనమైన అధ్భుత నటనా చక్రవర్తివి

ఎంత పెద్ద డైలాగైనా..

ఎంతటి కఠిన పద్యమైనా..

నీ యాసతో రక్తి..నీ అనునయంతో అనురక్తి.

నటనకే వన్నెలు దిద్దిన వెండి తెర రారాజువు.

తెలుగునాట ఇలవేల్పువు. 

కళ్ళు మూసి ఏ దేవుడిని వేడుకున్నా..

నీ ప్రతి రూపమే కనిపించు..

తెలుగింట ఆరాధ్యం నీవు.

ఆ దేవుడు ఎంటుంటాడో తెలియదు కానీ, ఇంటింటా రాముడు, కృష్ణుడు నీవే చిత్రాలు.. అదే భలే విచిత్రాలు.

పండిత పామరులను మెప్పించు 

అద్భుత చలన చిత్రాలు..

తెలుగు చిత్ర పరిశ్రమను 

తమిళ నాట నుండి

తెలుగునాడుకు తరలించిన ధన్యజీవి నీవు

తెలుగు దేశమును స్థాపించి తెలుగు వాడి, వేడి, కీర్తి కిరీటాలను

ఖండాంతరాలు చాటిన తెలుగు తేజం నీవు..

నటనకు నడతను నేర్పిన 

నవరస నటనా సార్వభౌముడివి

రాజకీయాలలో కొత్త వరవడి సృష్టించి 

సుపరి పాలనను అందించిన కోదండ రాముడివి.

నీ కీర్తి అజరామరం  

నీ యశస్సు జగద్వితం. 

నీ ప్రతిభ ఆచంద్ర తారార్కం. 

నీ ఘనత విశ్వ విఖ్యాతం.

అహో ఆంధ్ర భోజా..

అమరం నీ కీర్తి పతాక..

అందుకో మా జేజేలు..