శ్రీ విష్ణు సహస్రనామాలు (బాల పంచపది )-ఎం. వి. ఉమాదేవి

816)సర్వతోముఖః -

ఏకకాలంలో సర్వమూ చూచువాడు 

అన్నివిధములుగా నిలుచువాడు 

విషయములలో ప్రజ్ఞగలిగినవాడు 

నమ్మినవారికి అండయైనవాడు 

శ్రీ విష్ణు సహస్రనామాలు ఉమా!

817)సులభః -

భక్తసులభుడు తానైనవాడు 

తేలికగా లభించుచున్నవాడు 

భక్తులను ఆదరించగలవాడు 

ఆశ్రయించువారిని బ్రోచువాడు 

శ్రీవిష్ణు సహస్రనామాలు ఉమా!

818)సువ్రతః -

మంచివ్రతము గలిగినవాడు 

కార్యాచరణము చేయుచున్నవాడు 

కర్తవ్యము నడుపగలవాడు 

సువ్రతదీక్ష యున్నట్టివాడు 

శ్రీవిష్ణు సహస్రనామాలు ఉమా!

819)సిద్ధః -

సత్య స్వరూపియైనట్టివాడు 

సిద్ధపూర్ణ రూపములోనివాడు 

బుద్ధభగవానుడైయున్నవాడు 

స్వయంసిద్ధుడైనట్టి వాడు 

శ్రీ విష్ణు సహస్రనామాలు ఉమా!

820)శత్రుజిత్ -

శత్రువులను జయించునట్టివాడు 

సజ్జన విరోధులను తృంచువాడు 

పగతురను భంజించువాడు 

దుష్ట సంహారము చేయగలవాడు 

శ్రీవిష్ణు సహస్రనామాలు ఉమా!

(సశేషం )