ధీరుల త్యాగ ఫలం;- - కవిరత్న నాశబోయిన నరసింహ (నాన), ఆరోగ్య విస్తరణ అధికారి, 8555010108.

ఎన్నో బెదిరింపు చర్యల ఎదిరింపు పరంపర 

ఎన్నెన్నో తిరగబడి బిగించిన ఉక్కు పిడికిళ్ళు 

మరెన్నో బలిదానాల నెత్తుటి మరకల పేజీలు 

ఇంకెన్నో ఉవ్వెత్తున ఎగిసిపడే అగ్నికెరటాలు !

ఆంగ్ల వలస పాలన విముక్తికై తూటాలకు ఎదురొడ్డి 

బానిస బంధన చేధనకై ఉరికంబానికి ఊయలలూగి 

ఓ అహింసా వాదం మరో సాయుధ పోరు మార్గం

కుల మత భాషా బేషజాలకు నిప్పంటించిన వైనం !

లాల్ బాల్ పాల్ గాంధీ అంబేద్కర్ సరోజినీ 

భగత్ ఆజాద్ అల్లూరి నేతాజీ వీరనారి ఝాన్సీ

వేలవేల ఉద్యమ దివిటీల ఉత్ప్రేరక కారకం

అంచెలంచెల క్విట్ ఇండియా ఉద్యమ శిఖరం !                                                                                                  

అఖండ భరత అశేష జన నినాదం   

కవి గాయక నాయక చైతన్య ప్రవాహం                                                      

ఎదఎదలో దేశభక్తి సమైక్య గీతాలాపనం                                                                                   

నిద్రాణ జాతి యావత్తు జాగృతమైన వైనం !

అమెరికా పౌరహక్కుల సమరానికి ప్రేరణగా 

దక్షిణాఫ్రికా వర్ణ వివక్ష పోరుకు మార్గదర్శిగా

ఒకటా రెండా శతవసంతాల పోరాట ఘనచరిత

భరతమాత చరణాల చెంత నెత్తుటి దీపారాధన !

 

దేశమిచ్చిన దేహం కణకణం దేశానికే అర్పితం

తల్లీ! నీకోసం మరణం నా జన్మ ధన్యమనే సంకేతం

ధీరుల త్యాగగుణం భావితరం ఆశల వారధి కోసం

స్వేచ్ఛ సుమ ఫలాలిచ్చిన అమర వీరులకు వందనం !

(స్వాతంత్ర్య దినోత్సవ శుభాకాంక్షలతో)