దూరం;- డా.టి.రాధాకృష్ణమాచార్యులు-9849305871

మరీ ఎంతో కాదు సుమా 

దూరం అలాగని దగ్గర కూడా 

కాదు

కొలువలేనంత దీర్ఘం కాదు మరి పొట్టి రూపం కానేకాదు

దీని వేగం మాత్రం ముక్కుమీది కోపం కన్నా ఎక్కువే మరి 

చిక్కంతా గమ్యం లేని అర్థంకాని సంచారం

శృతిలేని సంసార సాగరంలో అన్యాపదేశ ఆగమన సంకీర్తన శ్రవణ ఫలం కాబోలు

మనమనుకుంటాం గానీ ఇది ఎవరూ కలుపలేనిది కాదనీ  చేతుల ప్రేమ అల్లుకున్న తీగ తీరు 

నన్నూ ఆటపట్టించిన సందర్భాలెన్నో బాల్యచేష్టల పరాకాష్ట 

అప్పుడు నాకు బాల్యం కేరింత అడుగులేసే నా మనుమరాలు ఆటపాటల మైదానంలో చిరు విరామమైనా

చిరునవ్వు పూలతోట దులుపుతుంది లేలేత విసురులో 

తాతా! నాతోనే ఆడాలి పాడాలి అటూఇటూ పోవద్దు ఓ చిన్న ఫర్మానా వదిలింది

చిన్న విరామ చిహ్నమూ 

మధ్యన దూరిన దూరం భావనే వాక్యంలో

మనసంతా 

నిరంతర రక్తప్రసరణ లయ అమేయ విప్పారుతున్న బోసినవ్వుల గెలాక్సీ

కనిపించని చిన్న చుక్కంత దూరం

కూడా భరించలేనిది కలల బాల్యం

ఏంతో విలువైనది కదా బతుకులో