ప్రయాణం ::- డా.గౌరవరాజు సతీష్ కుమార్.

 నేను బస్సెక్కి 
కిటికీ పక్కనే కూర్చున్నా
బస్సు కదిలింది 
నా మనస్సూ కదిలింది
కిటికీ పక్కనే కూర్చున్నా కదూ
దృశ్యాలు దృశ్యాలుగా
దృశ్యాలు పరుగు పెడుతున్నాయి
అదేం ఆశ్చర్యమో
అవన్నీ వెనక్కు పరుగెడుతున్నాయి 
వాటికేం పనో?
కాసేపు నాకు అర్థం కాలేదు 
ఆ దృశ్యాలన్నీ వెనక్కు పరుగెడుతున్నాయా?
లేక….,
నేనే ముందుకెళుతున్నానా?
ఏమయితేనేంలే
ఆ దృశ్యాలు నా మనో యవనికపై
ముద్రితాలౌతున్నాయి
వాటిని చూస్తూ
ఆనందం నా గుండె గూట్లోకి
ఇంకుతోంది
ఆనందో ప్రయాణం!!
**************************************