కల కాలిపోయింది...:- ప్రమోద్ ఆవంచ

జోరు వానతో కన్నీళ్లు జతకూడి
అక్షరాలుగా ప్రవహిస్తున్నట్లు
మండుటెండలో ఒంటరి ప్రయాణం
కన్నీళ్ళ జాడ కోసం వెతుక్కున్నట్లు
కలలన్నీ ఎడారి వానలో తడుస్తున్నట్లు
ప్రతి క్షణం ఉక్కపోతతో ఉక్కిరిబిక్కిరి
అవుతుంది
నిన్నటి జ్ఞాపకం మస్తిష్కంలో ఈదుతున్నట్లు
రెక్కలొచ్చి మనం ఎటో ఎగిరిపోయినట్లు
నిశీధి మబ్బుల్ని వీడి వెన్నెల ప్రపంచాన్ని
చూసినట్లు
గర్జించిన ఆకాశం ముఖంలో మెరుపులు
గుండెల్లో గుబులు రేపుతున్నట్లు
కాళ్ళు కింది నేల కదులుతుంది
నీ పాదాలను గట్టిగా పట్టుకున్న నా చేతులు
వణుకుతున్నాయి
ఎప్పటికీ నీ ఊహ నా మదిని ఉల్లాస మందిరం
చేసినట్లు
నా మనసులో నీ మాటల ఊట ఊరుతున్నట్లు
ప్రేమ ప్రవాహంలో పడి మనం ఊరేగుతున్నట్లు
మనం ప్రపంచ యాత్ర చేస్తూనే ఉన్నాం
మరేంటి ఇప్పుడు...
ఇంకా ఏదో మిగిలి ఉన్నట్లు
ఇంకేదో తెలియని తీరాలను తాకాలని
మరేదో ఒక నీ తీయని స్పర్శ మళ్ళీ మళ్ళీ
కావాలనీ
కలిసిరాని కాలంతో పోరాటం చేస్తున్నట్లుంది
కల కాలిపోయిన వాసన ముక్కుపుటాలను
వెక్కిరిస్తుంది...