అమ్మాయి చదువు:- తోట కార్తీక -9వ.తరగతి-తెలంగాణ ఆదర్శ పాఠశాల-లింగాల ఘనపురం-మండలం-జనగామ జిల్లా

 నాగారం అనే పల్లెటూరులో ఒక చిన్న కుటుంబం నివసిస్తూ ఉండేది. విద్య అనే 10 సంవత్సరాల అమ్మాయి ఆ కుటుంబంలో గారాల బిడ్డ.ఆటపాటలలో,చదువులలో చాలా చురుకుగా ఉండేది.ఆ ఊరిలో ప్రభుత్వ పాఠశాల లేనందువలన పక్క ఊరికి వెళ్లి చదువుకోవాల్సి వచ్చేది.ఆ ఊరు మూఢనమ్మకాలకు పెట్టింది పేరు.ఆడపిల్లలు చదువుకోవద్దు,ఆడపిల్లలకు చదువు అవసరం లేదు అనేది ఆ ఊరి ప్రజల యొక్క అభిప్రాయం. అందుకే చిన్న వయసులోనే అమ్మాయిలకు పెళ్లిళ్లు చేసేవారు.ఆ ఊరిలో ఉన్నత విద్య చదివిన వారు  ఎవరూ లేరు. విద్య వాళ్ళ నాన్నకు,నానమ్మ,తాతకు విద్య చదువు కోసం వేరే ఊరికి వెళ్లడం ఏమాత్రం ఇష్టం లేదు.కాని వాళ్ళ అమ్మకు అది నచ్చలేదు.తన కూతుర్ని బాగా చదివించాలని,మంచి ఉద్యోగం చేపించాలని కోరిక.కానీ తన భర్త,అత్తమామలు అందుకు ఒప్పుకోలేదు.విద్యకు కూడా బాగా చదువుకోవాలని కోరిక.మంచి ఉద్యోగం చేయాలని,తన కుటుంబానికి ఆసరాగా ఉండాలని,ఆ ఊరిని మార్చాలని తనకు ఒక బలమైన కోరిక.అందుకే తను చదువుకుంటానని పోరు పెట్టింది.ఆ అమ్మాయి పట్టుదలకు వాళ్ళ నాన్న,నానమ్మ,తాతయ్యల మనసులు కొంచెం కరిగాయి.పదవ తరగతి తర్వాత తప్పకుండా పెళ్లి చేస్తామనే షరతుతో అమ్మాయిని బడికి పంపించారు.అప్పటినుండి విద్య ఎంతో కష్టపడి శ్రద్ధతో చదువుకున్నది. ఇంటి పనులు చేస్తూ,చదువులో కూడా మంచి ప్రతిభను కనబరిచేది.పాఠశాలలో కూడా మంచి పేరు తెచ్చుకున్నది. పాఠశాలలో జరిగే అన్ని పోటీలలో అన్ని బహుమతులు విద్యకే వచ్చేవి.ఆ అమ్మాయి పక్క ఊరికి వెళ్లి చదువుకోవడం ఆ ఊర్లో ఉన్న వాళ్లకు అస్సలు నచ్చలేదు.కానీ విద్య ఎవరి మాటలు వినకుండా తన పని తాను చేసుకుంటూ వెళ్ళేది. ఎన్నో కష్టనష్టాలు ఓర్చుకొని పదవ తరగతి వరకు ఓపికతో చదువుకుంది.పదవ తరగతి పరీక్షలలో మంచి మార్కులు సాధించి అందరి మెప్పును పొందింది.ఆ విషయం వార్తాపత్రికలలో విద్య ఫోటోతో సహా ప్రచురించడం జరిగింది. టీవీలలో ఆ అమ్మాయి గొప్పతనం గురించి ప్రచారం చేశారు.ఆ జిల్లా కలెక్టర్ గారు ఆ అమ్మాయిని సన్మానించి ఎంతగానో మెచ్చుకున్నారు. బాలికలు చదువు యొక్క గొప్పతనం గురించి, బాలికలు చదువుకుంటే సమాజం ఎలా బాగుపడుతుంది అని తెలియజేస్తూ పేపర్ ప్రకటన రావడంతో ఆ అమ్మాయిని అందరూ ప్రశంసించడం ఆ ఊరి వారందరినీ ఆలోచింపజేసింది. నాగారం గ్రామ ప్రజలు వారి కుమార్తెల జీవితాలను బాల్యవివాహాలతో ఎలా నాశనం చేస్తున్నారో తెలుసుకొని కన్నీరు మున్నీరయ్యారు.తమ తప్పుని తెలుసుకున్నారు. విద్య సాధించిన ఫలితానికి మనస్ఫూర్తిగా అభినందన తెలియజేసారు. వారి తప్పును తెలుసుకొని క్షమించమని కోరారు.అప్పటి నుండి మిగతా వారు కూడా అమ్మాయిలను చదువు కోసం వేరే ఊరికి పంపించ సాగారు.అందరిని బాగా చదువుకోమని ప్రోత్సహించారు. బాలికల చదువు కోసం పోరాటం చేయడానికి సిద్ధమయ్యారు.అలా విద్య తన యొక్క సంకల్పబలంతో తన జీవితాన్ని తీర్చిదిద్దుకోవడమే, కాకుండా ఒక ఊరి ప్రజల యొక్క ఆలోచన విధానాన్ని మార్చివేసింది. బాల్యవివాహాలు అనే సాంఘికదురాచారాన్ని రూపుమాపింది.దీనికి అంతటికి కారణం విద్యకు ఉన్న చదువుకోవాలనేటువంటి బలమైన కోరిక.చదువు ద్వారా తన జీవితాన్ని మార్చుకున్న విద్య ఈనాటి బాలికలకు ఆదర్శం.

బాల్య వివాహాలు వద్దు బాలికల చదువు ముద్దు.