కొంగ- తాబేలు (గేయ కథ ):- ----- కోమటిరెడ్డి బుచ్చిరెడ్డి- 9441561655

ఊరికి ఉత్తరాన ఉందొక చెరువు

చెరువు గట్టున  ఊడలమర్రి

కొమ్మల మీదనే కొంగల వాసం

చెరువు చేపలే వాటికి గ్రాసం

చెరువులోని కొంగల తోటి

తాబేలొకటి  సోపతి చేసే

కొన్నాళ్లకు ఎండలు మెరిసే

చెరువుల నీళ్లు ఇంకిపోయెను

చేపల సంఖ్య తగ్గిపోయేను

కొంగల కడుపు మాడ బట్టెను

మరో చెరువుకు చేరుకుందమని

తాబేలుతో బాస చేసేను

ఎగిరిపోవుటకు సిద్ధం అయిరి

రెక్కలు కలిగిన పక్షులు మీరు

ఎట్లైనను ఎగిరిపోదురు

మెల్లగా నడిచే తాబేలును 

మీతో వచ్చుట ఏల కుదురును

బాధతో అన్నది తాబేలు

అయ్యో అంటూ కొంగలు

యుక్తితో వెల్దుము మనమంతా

కొంగలు అన్నవి ఆప్యాయంగా

బకములు  రివ్వున ఎగిరినవి

అడవి అంతయు తిరిగినవి

కర్ర నొకటి చూచినవి

ముక్కున కరచుక తెచ్చినవి

గట్టిగా నోటితో కర్రను పట్టుము

  తుర్రున మేము కర్రతో లేతుము

  ఎగిరేటప్పుడు ఎవరేమన్నా

మాటలాడుట మంచిది కాదని

బుద్ధులు చెప్పి పైకి ఎగిరెను

చుక్కలు తాకే ఎత్తులో కొంగలు

రెక్కలు విప్పి ఎగురుతు ఉంటే

ఎన్నడు లేని వింతను చూసి

కేకలు వేసిరి కూతలు పెట్టిరి

ఇదేమి లీల? ఏడికి పోక

ఎన్నడు చూడని వింతను చూసి

  నేలన  పిల్లలు అల్లరి చేస్తూ

చప్పుడు చేసి చప్పట్లు కొట్టిరి

ఏమా లొల్లి? ఎందుకు చేసిరి?

ఎవరాపిల్లలు? ఏమిటి గొడవలు?

కేకలు వేసే పిల్లల చూసి

ఎందుకు అనుచు తాబేలు

తన నోరును విప్పెను

ఇంకేమున్నది ఇంకేమున్నది

అవసరం లేని ముచ్చట చూసి

దబాలుమంటూ  నేలన రాలేను

ప్రాణం విడిచె ఆ తాబేలు..!