పిల్లి నింద :----డా.పోతగాని సత్యనారాయణ

 ఒక పల్లెటూరులో రామయ్య అనే రైతు తన పశువులతో ప్రశాంతంగా జీవిస్తున్నాడు. అతనికి ఒక ఆవు, ఒక నమ్మకమైన కుక్క, ఇంకా రెండు పిల్లులు ఉండేవి. ఒకటి అల్లరిది, మరొకటి తెలివైన నల్ల పిల్లి.
ఒక సాయంత్రం రామయ్య ఆవు పాలు వేడిచేసి గిన్నెలో చల్లార్చి మూతపెట్టి ఉంచాడు. తెల్లారి చూసేసరికి గిన్నె ఖాళీ! పాలు మాయం. రామయ్యకు కోపం నషాళానికి అంటి, 
"నా పాలు ఎవరు తాగేశారు?" అని గట్టిగా అరిచాడు.
వెంటనే అల్లరి పిల్లి ముందుకు దూకి, కుక్క వైపు వేలెత్తి చూపి, 
"మీ పాలు తాగింది ఆ కుక్కనే! నేను చూశాను!" అని బొంకింది.
కుక్క అమాయకంగా, దిగాలుగా నిలబడింది. అది ఎప్పుడూ దొంగతనం చేయలేదు. రామయ్య అల్లరి పిల్లి మాటలు నమ్మి, కుక్కను మందలించాడు. 
"నీకెంత ధైర్యం? నా పాలు తాగుతావా?" అని కోప్పడ్డాడు. కుక్క కంటతడి పెట్టింది.
పక్కనే ఉన్న ఆవు ఆశ్చర్యంగా చూస్తూ,
కుక్క ఎప్పుడూ ఇలా చేయదు. ఇది అబద్ధం!" అంది.
అప్పుడు నల్ల పిల్లి మెల్లగా అల్లరి పిల్లి దగ్గరికి వచ్చి, దాని నోటిని పరిశీలించింది. అల్లరి పిల్లి నోటికి ఇంకా పాల మరకలు అంటుకుని ఉన్నాయి. నల్ల పిల్లి అల్లరి పిల్లిని చూస్తూ, గంభీరంగా ఇలా అంది, 
"ఓ అల్లరి పిల్లీ! నీ అబద్ధం పనికిరాదు. నీ నోటికి ఇంకా పాల మరకలు అంటుకునే ఉన్నాయి. నువ్వు తప్పు చేసి, అమాయకుడైన కుక్క మీద నింద వేస్తున్నావు. సరిగ్గా ఆవుపాలను తాగి కుక్క మీద కమ్మెరు వేసిన ఎద్దులాగా ప్రవర్తించకు! దొంగతనం నువ్వు చేసి, ఆ నింద కుక్క మీద వేస్తావెందుకు?"
నల్ల పిల్లి మాటలకు రామయ్యకు నిజం అర్థమైంది. అల్లరి పిల్లి నోటికి ఉన్న పాల మరకలను చూసి, అది అబద్ధం చెప్పిందని గ్రహించాడు. రామయ్య అల్లరి పిల్లిని మందలించి, కుక్కకు క్షమాపణ చెప్పాడు. తన నేరాన్ని దాచుకోవడానికి అమాయక కుక్కపై నింద వేయడం, ఈ సామెతకు సరిగ్గా సరిపోయింది.