వెధవ బిడియం:- - జగదీశ్

 మేమున్న ఇంటికి ముందూ వెనుకా రెండు మామిడి చెట్లు ఉన్నాయి. అఫ్ కోర్స్, ముందు వెనుకా అన్నానే కానీ అవి ఎదురింట, వెనుకింట ఉన్నాయి. అవి జూలై, ఆగస్టు నెలల్లో కాస్తాయి. ఈసారైతే మరీ విరగకాసాయి. వాటిని చూస్తున్నప్పుడల్లా ఓ ఆశ తళుక్కుమంటుంది. రెండు చెట్లలో కాకపోయినా కనీసం ఒక చెట్టు నుంచైనా ఓ కాయ కోయాలని.‌ చిన్న చిన్న పిల్లలయితే బంతి రాయి గట్రా విసురుతుంటారు. 
చిన్నపిల్లల్ని చూస్తున్నప్పుడల్లా నాకు ఓ ఆశ పుడుతుంది. 
ఎవరికీ తెలీకుండా ఓ రాయి విసరాలని, ఆ రాయికి తగిలి ఓ మామిడికాయ కింద పడితే దాన్ని ఏరుకుని ఇంట్లోకొచ్చెయ్యాలని.
కానీ వయస్సేమో 71. నేనిప్పుడలా  రాయి విసిరి ఎవరైనా చూస్తే ఏమనుకుంటారోనని ఓ జంకు. బిడియం కూడా. 
అందుకే ఎదురింటావిడను అడిగాను, మీ మేడెక్కి ఒక్కటంటే ఒక్క కాయ కోసుకుంటానని. 
అయితే ఆవిడన్నారు కదా..."మీకా కష్టం ఎందుకండీ, నేనే కోసిస్తాను అని. 
అబ్బే మీరలా కోసిస్తే నాకానందం లేదు...నేనే కోసుకుంటానని చెప్పగా అందుకావిడ ఒప్పుకున్నారు కానీ ఈ క్షణం వరకూ కోయినే లేదు మామిడికాయ. 
అడగడమైతే అడిగాను కానీ అందులో మళ్ళీ బిడియం. ఈ వెధవ బిడియాన్ని మూట కట్టి పారెయ్యాలి ఎక్కడైనా.