తాడెక్కేవాడుంటే..:----డా.పోతగాని సత్యనారాయణ

 అనగనగా ఒక అడవిలో ఒక జిత్తులమారి నక్క ఉండేది. అది ఎప్పుడూ ఇతరులను మోసం చేసి బ్రతికేది. అడవిలోని జంతువులన్నీ దానికి భయపడేవి. దాని మాటల గారడీకి చాలా జంతువులు లొంగిపోయేవి.
ఒకరోజు ఆ నక్క ఒక బుద్ధిమంతురాలైన పావురాన్ని చూసింది. ఆ పావురం ప్రతిరోజూ కష్టపడి విత్తనాలను సేకరించుకునేది. 
"ఈ పావురం సంపాదనను దోచుకోవాలి," 
అని ఆ నక్క మనసులో అనుకుంది. అది ఆ పావురం దగ్గరకు వెళ్లి, మూడు కోసుల దూరంలో ఉన్న వేరుశనగ సోగల గురించి చెప్పి, వాటిని సేకరిద్దామని నమ్మబలికింది. ముందు పావురం వెళ్లి ఆ ప్రదేశాన్ని చూసిరమ్మని చెప్పింది.
ఆ పావురం అమాయకంగా నమ్మి, వేరుశనగ సోగలు ఉన్న ప్రదేశాన్ని కనుగొని తిరిగిరాగానే, ఆ నక్క తన నిజస్వరూపాన్ని చూపించింది. 
"నువ్వు బలహీనురాలివి, ఇది మొత్తం నాకే చెందుతుంది," అని ఆ పావురంను అక్కడి నుంచి తరిమేసింది. 
ఆ పావురం తన కష్టం వృథా అయ్యిందని చాలా బాధపడింది. ఆ నక్క మాత్రం తన తెలివికి నవ్వుకుంది.
ఆ నక్క మోసం చేసి సేకరించిన వేరుశనగ సోగలను తన బొరియలో దాచుకుంది. అయితే, ఈ మోసం అడవిలోని మహా తెలివైన గరుడపక్షికి తెలిసింది. ఆ గరుడపక్షి ఆ నక్కకు తగిన బుద్ధి చెప్పాలని ఒక ప్రణాళిక వేసుకుంది.
ఆ గరుడపక్షి ఆ నక్క దగ్గరకు వెళ్లి, రహస్య ప్రదేశంలో పెద్ద మొత్తంలో ఉన్న మాంసం గురించి ఆశ చూపింది. మాంసం పేరు వినగానే ఆ నక్క కళ్ళు మెరిశాయి. తన దగ్గర ఉన్న వేరుశనగ కాయలను వదిలేసి, ఆ గరుడపక్షితో కలిసి మాంసం కోసం బయలుదేరింది.
ఆ గరుడపక్షి ఆ నక్కను జాగ్రత్తగా ఏర్పాటు చేసిన ఒక బోను దగ్గరకు తీసుకెళ్లింది. ఆ బోనులో తాజాగా వేటాడిన మాంసం కనిపించేలా పెట్టింది. 
"ఈ బోను లోపల ఆ మాంసం ఉంది. నువ్వు లోపలికి వెళ్లి సేకరించు," అని చెప్పింది. 
ఆ నక్క మాంసం ఆశతో ఏ మాత్రం ఆలోచించకుండా బోనులోకి దూరింది. వెంటనే ఆ గరుడపక్షి బోను తలుపు మూసివేసింది. 
"నువ్వు ఆ పావురంను మోసం చేసినట్టే, నేను నిన్ను మోసం చేశాను. ఈ బోనులో నుండి నువ్వు బయటకు రాలేవు," అని చెప్పి ఎగిరిపోయింది.
ఆ నక్కకు అప్పుడు తను చేసిన తప్పులు గుర్తుకొచ్చాయి. 
"తాడెక్కేవాడుంటే వాడి తలను తన్నేవాడు ఇంకొకడు ఉంటాడు" 
అనే సామెత తన విషయంలో నిజమైందని అర్థమైంది. ఆ నక్క ఎంత ప్రయత్నించినా బోను నుండి బయటపడలేకపోయింది. దాని ఆశ, మోసం దానిని సర్వం కోల్పోయేలా చేశాయి.