జీవనయానంలో...:- గుండ్లపల్లి రాజేంద్రప్రసాద్, భాగ్యనగరం

పిడికిలి మూస్తున్నా–

రహస్యాలు దాచటం కోసం.

నెత్తిన కప్పుకుంటున్నా –

ఆశలు సజీవంగానిలుపటం కోసం.

మాటలు విసురుతున్నా –

భావాలు వ్యక్తపరచటం కోసం.

తలను గీసుకుంటున్నా –

ఆలోచనలు పారించటం కోసం.

భుజాలు వంచుతున్నా –

బాధ్యతలు భరించటం కోసం.

బతుకుబండిని ఈడుస్తున్నా –

జీవితచక్రాలను దొర్లించటం కోసం.

చేతులను శ్రమపెడుతున్నా –

ఫలాలు పొందటం కోసం.

కాళ్లు కదుపుతున్నా –

గమ్యాలను చేరటం కోసం.

ఎత్తుకు ఎగురుతున్నా –

ఆకాశం అందుకోవటం కోసం.

మనసు విప్పుతున్నా –

ప్రేమను పంచుకోవటం కోసం.

నాకు అండగా నిలుస్తారా?

నా పయనానికి సహకరిస్తారా?

నన్ను ప్రోత్సహిస్తారా?

నాగుండెల్లో వెలుగులు నింపుతారా?