ప్రపంచం ఒక శాంతినివాసం…?- కవి రత్న -సాహిత్య ధీర -సహస్ర కవి భూషణ్-పోలయ్య కూకట్లపల్లి-అత్తాపూర్, హైదరాబాద్

కంచంలో…
కమ్మని భోజనం వడ్డించి
ఎవరైనా కడుపు నింపితే
ఆకలి తీరిపోతుంది…
అన్నదాతా సుఖీభవ
అనాలనిపిస్తుంది...!

మంచంలో…
పరుపు మేఘంలా
మెత్తగా ఉంటే వాలిన మేను
మెల్లగా నిద్రలోకి జారిపోతుంది
ఆపై కనురెప్పల్లో కలల రాజ్యమే..!

ప్రపంచంలో…
ఒక మనిషీ
మరో మనిషిని ప్రేమిస్తే…
మనిషి మనిషిలో
మంచితనం దీప్తిగా వెలిగితే…!

వినయం విధేయత
విజ్ఞాన కుసుమంలా వికసిస్తే...
మనసులో మానవత్వం
సంధ్యారాగంలా పరిమళిస్తే…!

ప్రేమతత్వం నిశ్చల నిర్మల
నదిలా నిరంతరం ప్రవహిస్తే…
సహనం సౌభ్రాతృత్వం
సూర్యోదయంలా ఉదయిస్తే…!

సృష్టిలో ప్రతి జీవినీ
సమదృష్టితో చూస్తే…
ప్రకృతిని తల్లిలా ఆరాధిస్తే…
శాపాలకు బలికాక
పంచభూతాల్ని శాంతింపజేస్తే…
ఆత్మ పరమాత్మలో
నిశ్శబ్ద దీక్షగా లీనమైతే…!

అంతరంగమేదైనా
అది అమృతం
కురిసిన రాత్రియే…
అది ఒక అక్షయపాత్రే…
జీవితమేదైనా అది
సుఖశాంతుల సూర్యోదయమే…!

ఇక ప్రపంచం ఒక శాంతినిలయమే…!
జీవితమంతా స్వర్ణ కాంతిమయమే..!