అమ్మ! :- గంగరాజుపద్మజ హైదరాబాద్- 8688807575

 అమ్మ నన్ను భూమ్మీదకు రమ్మంది
ముద్దాడి బంగారు బొమ్మంది
ఏడిస్తే హత్తుకుని ఊరుకొమ్మంది 
నాన్నకి చూపించి ఎత్తుకొమ్మంది
చక్కనైనపేరుని నాకిమ్మంది 
జోలపాడి బజ్జోమంది 
మమ్మ తిందువు గాని రమ్మంది
లాలపోసి దీర్ఘాయువు కమ్మంది 
బబ్బతాగించి జీర్ణించుకొమ్మంది 
బొమ్మనిచ్చి ఆడుకొమ్మంది 
వేలుపట్టుకు నడకనేర్చుకొమ్మంది 
నేను కింద పడితే ఏంకాదు లెమ్మంది 
పలకిచ్చి అఆలు దిద్దమంది 
తప్పు చేస్తే ఒప్పుకొమ్మంది 
చదివి యోగ్యురాలివి కమ్మంది 
పెద్దల ఎదిరిస్తే బాగుపడవు పొమ్మంది 
సోమరితనం పనికిరాదంది 
ఎదిగినా ఒదగమనే అంది
కష్టార్జితాన్ని నమ్ముకొమ్మంది 
పరుల నష్టపెట్టవద్దంది 
శాంతం సహనం తో ఉండమంది 
కన్నుమూసేముందు చేయూపి వీడ్కోలు ఇమ్మంది🌹