పుస్తక వింజామరలు :- డా.టి.రాధాకృష్ణమాచార్యులు-9849305871

ఉక్కపోతలో గది తలుపులు మూసుకున్న ప్రపంచంలో

తెరుచుకన్న వెంట్ 

గోడలకు మొలిచిన చిన్న కిటికీ

హస్త భూషణంగా నాలో ఒక జీవిత స్నేహం జుగలబందీ

స్వేచ్ఛ గంధం పూసిన ప్రక్షాళన దాతి 

రాగ పరాగాల ఆకాశవిజ్ఞాన పొది ఖ్యాతి కాదు బాధల ముళ్ళ బతుకు బాటల చదివే చకోరాలు 

మృదువుగా మునివేళ్ళు సున్నితంగా మెత్తని పేజీల్లోకి పంపిన సంగీతం

నా బతుకు తెరిచిన సిరుల గనులు

చేతిలో నువ్వు చెలి

చెలిమి బుగ్గలను నునువెచ్చగా మీటిన జ్ఞాన పథాలు

నాలోని నవ్వు బతుకున పోసిన ఆకుపచ్చ పూల వసంత వాకిలి

సంబురం అక్షరాలదా లేక చదివే నాదా సరదాలో భూమ్యాకాశాలను ఏకం చేసిన 

జ్ఞాన సుధల పంచే ప్రదర్శన వేదికదా 

ఎక్కడైనా ఎప్పుడైనా ప్రపంచమంతా గాలించినా 

కనిపించదే 

చీకట్ల ఛేదన వేదిక బహుముఖ అక్షర దుందుభి

నాడిని తట్టిలేపే బొడ్డుతాడు అమ్మ నేర్పిన జ్ఞాన నాళిక 

అక్షరాల వెలుగు ముగ్గులు దిద్దిన బడిలో 

మెరుపుల కాంతి పుస్తక ప్రదర్శన 

చేతి ఆభరణం మూసిన పిడికిట ఆయుధం 

తెరిచి చూస్తే జ్ఞాన విజ్ఞాన విస్ఫటనాల పచ్చ చిగురు

బతుకు గాలితిత్తుల ఊపిరి

నా గుండె స్పందన పుస్తక వింజామర

హైదరాబాద్ బుక్ ఫేయిర్...

==================================

(38వ,హైదరాబాద్ బుక్ ఫేయిర్ 19-12-2025న మొదలయే సందర్భాన...)