కోలాహల దృశ్యం:- డా.టి.రాధాకృష్ణమాచార్యులు- 9849305871

కాశ్మీరీ అందాలు

డాల్ లేక్ సుందర తీరాలు 

నా దేశం పూసిన చల్లని పరిమళాలు 

అందరినీ బంధాలతో అక్కున చేరదీసే

మట్టి సుగంధాల తోట హైదరాబాద్ 

గగనంలో చుక్కలన్నీ జతగూడిన

ఆబాదీ మనసు అవ్వా అక్కా తమ్మీ జిందాబాద్

ఇప్పుడిక్కడ భాగ్యసిరి

మట్టిలో వీచే గాలిలో మార్దవం   

విశ్వవేదికల ఆకర్షణ కానీ

నేల మందహాసం పరవశంలో 

ప్రవాహ నదులన్నీ ఒక్కదుటున 

మనను తడిపేసే మహోత్సవాలు 

నీకోసం నాకోసం మన వాకిట్ల వాలే

జ్ఞానాన్ని మోసుకొచ్చే అంతరంగాల చేతులు

తమలోకి ఒంపుకొనే అద్వితీయ చూపులు

చేతి ఆభరణం సొగసు

మేధను నింపే ఆలోచన కంపనాలు పూచే 

విన్నాణ జాతరలో ఊరేగే అక్షర గనులు

చూడ తరమా! సూర్యచంద్ర కళాపూర్ణోదయ హేల!

అటు చూడు 

దృశ్య వాహిని రంగులీనిన జ్ఞాన ముల్లె

అంతర్జాతీయ లఘుచిత్ర వెలుగు మెరుపుల మౌన సవ్వడి భాగ్య వేదిక హుస్సేన్ సాగర్ వీధుల

 ఆలోచనల విజ్ఞానం పిల్లల పెద్దలకు

మనోల్లాస అంతర్మథనం 

అయితే

ఎవరి మైదానం వారిది,ఎవరి ఆటా వారిదే

విశ్లేషణ వ్యాఖ్యానోపాఖ్యానాలు నజరానాలకు అందని చింత వింత

ఉట్టిమీది ముంతపై చూపు

వదిలిన బాణం ఆశల పల్లవి అది

బాకాలూదని నాకాలకోసం 

పొద్దు పూచిన చీకటినిద్ర మౌన కుబుసం వీడిన కలల కళలు

ఏదేమైనా

జ్ఞాన దేవాలయంలో కొలువున్న కమ్మలన్నీ 

మట్టి కొమ్మలు ఊగే విజ్ఞాన వీధిలో

గాలి గంధాలు పుస్తకం

కనుల చూసిన కళ!

సినీవాలి చిగురుబోణి రంగులకల

తళతళ జిలుగు రూపసి

అక్షరం ఒరుకులో

జ్ఞాన విజ్ఞాన దృశ్య మానసి 

మానసిక ఆనందాల రెక్కల విపంచి

సినిమా మౌనధ్వని రంగులద్దే ఇరువైనాలుగు కళల సమైక్య క్రతువు...

*&&&*

(హైదరాబాద్ బుక్ ఫేయిర్,హైదరాబాద్ వేదిక, డిసెంబర్ 19,2025.

&

అంతర్జాతీయ చిన్న సినిమా పండుగ,హైదరాబాద్ వేదిక,డిసెంబర్ 19,2025.)సందర్భంలో...