ఛాంపియన్ : - సరికొండ శ్రీనివాసరాజు

 వేసవి సెలవుల్లో పిల్లలందరూ అమ్మమ్మ ఇంటికి చేరినారు. ఇక బోలెడంత వినోదం. ఆటలే ఆటలు. పిల్లలందరూ ఎక్కువగా ఆడే ఆట క్యారమ్ బోర్డు. పోటీలు పెట్టుకుని మరీ ఆడుతున్నారు. ఆ ఆటలో ఆరితేరిన వారు రాము, వాసు. వీరితో పాటు విజయ, పావని, మహేంద్ర, శ్రుతి, చందన, రాజు, అమరేంద్ర, వినయ్ అందరూ పోటీలు పెట్టుకొని బాగా ఆడేవారు. గెలుపు ఓటములను పట్టించుకోకపోయేవారు. వాళ్లకు కావలసిందంతా కాలక్షేపం. 
     సిరి 3వ తరగతి చదువుతున్నది. వీళ్ళ ఆట చూస్తున్నంతసేపూ తనకూ వారితో ఆడుకోవాలని ఉండేది. చిన్నపిల్లవు. నువ్వేమీ ఆడలేవు అని అందరూ పక్కన పెట్టేవారు. సిరి రాము అన్నయ్య దగ్గరకు వచ్చి, "నాకు క్యారమ్స్ నేర్పించవా అన్నయ్యా!" అని అడిగింది. "చిన్న పిల్లవు. నువ్వు ఆడలేవు. వేరే ఆటలు ఆడుకో.?" అన్నాడు రాము. "నీతో ఆటనా? మా టైం వేస్ట్. వెళ్ళి టీవీ చూసుకో పో. మేమెవరమూ నీకు పోటీ రాము." అన్నాడు వాసు. సిగి ఏడుపును పట్టించుకునే వారే లేరు. 
    వేసవి సెలవులు ముగిసాయి. పాఠశాలలు ప్రారంభం అయినాయి. సిరి దిగులు మాత్రం పోలేదు. శ్రావణి టీచర్ పిల్లలను వేసవి సెలవులు ఎలా గడిపారో అడిగింది. సిరి వెక్కి వెక్కి ఏడుస్తూ తన బాధను చెప్పుకుంది. సిరి చాలా తెలివైన అమ్మాయి. బుద్ధిమంతురాలు. సిరి బాధ చూసి టీచర్ జాలిపడింది. శ్రావణి టీచర్ క్యారమ్స్ ఆటలో ఛాంపియన్. ఇంకేం! సిరి పంట పండింది. శ్రావణి టీచర్ ఆదివారాలు మరియు సెలవు రోజుల్లో సిరిని తన ఇంటికి తీసుకెళ్ళి క్యారమ్స్ ఆటలో మెళకువలు నేర్పింది. అవమానాలతో కుంగిపోతున్న సిరి ఏకాగ్రతతో రెట్టించిన పట్టుదలతో క్యారమ్స్ ప్రాక్టీస్ చేసింది. శ్రావణి టీచర్ చిన్నపిల్లను సైతం ఛాంపియన్ ను చేయడమే లక్ష్యంగా పెట్టుకుని శ్రావణినిని ఆటలో తీర్చి దిద్దింది. సిరి గెలుపు తన గెలుపు, సిరి సరిగా ఆట నేర్చుకోలేకపోతే తాను చిత్తుగా ఓడిపోయినట్లు భావించిన శ్రావణి టీచర్ సిరిని క్యారమ్స్ ఆటలో మంచి ఛాంపియన్ను చేసింది. 
      మళ్ళీ వేసవి సెలవులు వచ్చాయి. మళ్ళీ పిల్లలంతా ఒకచోట కలిసారు. సిరి ఛాంపియన్స్ అయిన తన ఇద్దరు అన్నలతో పందెం కాసి వారి ఇద్దరి మీదా ఆటలో ఘన విజయం సాధించింది. "అన్నలూ! ఎవరినీ చులకన చేయకండి. మీ ఆటను ఆటలో ఎంత వెనుకబడిన వారికైనా నేర్పి, వారిని ఛాంపియన్సును చేయండి. అప్పుడే మీరు నిజమైన ఛాంపియన్స్." అన్నది సిరి.
     మరునాడు రాము, వాసు సిరిని చేరి "క్యారమ్స్ ఆడుదాం రా!" అని పిలిచారు. "నాకు తీరిక లేదు. అమ్మమ్మతో కథలు చెప్పించుకోవాలి." అన్నది సిరి. వాసు, రామూలు సిరిని బతిమాలడం మొదలు పెట్టినారు. పట్టిన పట్టు విడవకుండా బతిమాలుతున్నారు.