సామెత -73- అభాగ్యుడికి ఆశలెక్కువ - నిర్భాగ్యుడికి నిద్ర ఎక్కువ
****
"ఏందో అవ్వా! గా భూషయ్య మావ దురదుట్టం! బంగారం ముట్టుకున్నా మట్టయితున్ది. నరుని దుట్టి పడిందో! నారాయన దుట్టి పడిందో తెల్వదు గని మావ ఆశలన్ని అడియాశలవుతున్నయ్!ఉన్నొక్క కొడ్కును మంచిగ సదివిచ్చి గొప్పోన్ని చెయ్యాలన్కుంటె గాడు కాత్త చెడు సవ్వాసాలు బట్టి పన్కిరాని పోరంబోకయ్యిండు. అరికాల్కి మట్టంటకుండ సూస్కునే అల్లుడు దొర్కాలని తల్కాయ తాకట్టు బెట్టి ఉన్నోడికిత్తె మారాణొతికె బతుకుద్దన్కుంటె,గాడేమో దరిద్రపు గొట్టుదానా! అని పవుతు మాటల్తో కుళ్ళబొడుత్తూ 'అద్దే,ఇద్దే' అని ఏడిపిత్తుండంట. ఇంగ గివన్నింటి మనియాదితో అత్త మంచాన బడింది." ఆపకుండా మావ ముచ్చటి చెబ్తున్న మాటలు ఇన్కుంట...
"అయ్యో కౌసల్యా!ఎంత పనాయెనేమే? బగవంతుడు సుత పగబట్టిండా ఏంది? "అబాగ్గుడికి ఆశలెక్వ -నిర్బాగ్గుడికి నిద్దరెక్వ" అన్న తీర్గైంది బూషయ్య మావ బతుకు". కొందర్కి ఇల్లూ ఆకిలి పిల్లలు ఏమన్కోకుండనె అన్నీ తీర్తయి.అన్ని రకాల కల్సొత్తది. ఇంగ కొందరుంటరు.గాళ్ళకన్ని సైన్మా కట్టాలె.సైన్మాలో సివరాకర్కి సుకాంతం సూపిత్తడు గని బత్కుల కొంత మందికి అన్ని ఎదుర దెబ్బలే తగుల్తుంటవి. ఏం జేత్తం తల్రాతని తెప్పించలేడెవ్వడు" గా మాటలు యిని నిజమే అవ్వా! అన్కుంట బోయింది కౌసల్య.
"అక్కడే కూసోని సద్వుకుంటున్న భూలచ్మి, బుడ్డోడు గదంత యిని అవ్వా! అబాగ్గుడు-నిర్ బాగ్గుడు గాళ్ళ పేర్లా ఏంది? గవ్వేం పేర్లు మాకు నచ్చలే.దేవుల్ల పేర్ల లెక్క కిట్టయ్య,రామయ్య,శంద్రయ్యని పెట్కోవచ్చు గద" ఇద్దరూ అవ్వకి శెరో పక్కన జేరి శెవి కాడ జొర్రీగలెక్కన లొల్లి జెయ్యబట్టిండ్రు.
మీకు గిట్ల జెప్తె సమజవ్వదు గని కత జెప్త ఇనుండ్రి. అనగనగా ఒక ఊల్లె ఓ బిచ్చపోడు ఉండేటోడు. "నన్నెందుకిట్ల బిచ్చపోని లెక్క పుట్టించినవ్ నాకు సుత డబ్బులుంటె గీ బిచ్చపు పని బంజేసి అవల్ దర్జాగా అందరొతికె బత్కేటోన్నిగా" ఎప్పుడూ దేవున్కి పెట్కుంట ఏడుకునేటోడు,తిట్టేటోడు,ఏడ్సుకుంట ఉండేటోడు.గప్పుడు దేవున్కి గా బిచ్చపోన్ని జూసి జాలి అన్పిచ్చి కళ్ళ ముందు పత్తెచ్చమై దోసిట్ల ఓ బంగారు నాణెం బెట్టి"దీన్ని జోలెల ఏస్కొని నన్ను తల్సుకో జోలె నిండుతుందిగని ఒక్క నాణెం సుత కింద పడనీయొద్ద" ని శెప్పి ఓ నాణెమిచ్చి మాయమైతడు.
ఇంగ గా ఆశపోతు బిచ్చగాడు గా నాణేన్ని జోలెల ఏస్కొని దేవున్ని తల్సుకుంట ఇంకా ఇంకా కావాలని ఆశతో కోర్కుంటడు. జోలె నిండి బర్వెక్వైద్ది. గా సంబురంల జోలె అడ్గున పొక్క ఉంది సూస్కోకుండ,గార్ల తేలిపోతూ పోతూ ఏవేవే కలలు కంటడు.ఇంగ జోలె పొక్క లోంచి ఒక్కొక్క నాణెం కింద పడి మాయమైతుంటది. తాను పడ్కొనే తావుకొచ్చి జోలె జూసెతల్కి అందుల ఒక్క నాణెం సుత మిగల్దు. గిట్ల ఆశపోతు అబాగ్గుడు అంటే అన్ని పోగొట్టుకున్నోడు.గది కత అబాగ్గుడు అంటే దురదుట్ట వంతుడని అంటరు. ఎవలన్న సాయం చేసినా నిల్పొకో లేక పోతడు. ఇంగ నిర్భాగ్గుడంటె బాగ్గం లేనోడు,పేదోడు అని అర్తం .గానికెప్పుడూ ఎతుకులాటె - ఏం జేసుడు లేదు గన్క పవుతు నిద్ర వోవుడే జెప్పిందవ్వ.
గిదండీ సంగతి!"అబాగ్గుడికి ఆశలెక్కువ- నిర్బాగ్గుడికి నిద్ర నా ఎక్కువ" అంటే గిదే మరి.
addComments
కామెంట్ను పోస్ట్ చేయండి