శిలువపై ప్రేమ, హృదయంలో వెలుగు:- సి.హెచ్.ప్రతాప్

 ప్రేమే ధర్మమని, క్షమనే మహాశక్తని, త్యాగమే నిజమైన విజయమని ప్రపంచానికి చాటిన మహానుభావుడు యేసు క్రీస్తు. మానవ చరిత్రలో ఆయన జీవితం, బోధనలు చూపిన ప్రభావం అపూర్వమైనది. భౌతిక సంపద, రాజ్యాధికారం, సైనిక బలం ఏమాత్రం లేకుండానే కోట్లాది హృదయాలను కదిలించిన దైవప్రేరిత జీవితం ఆయనది. సాధారణ కుటుంబంలో జన్మించి, వినయం, సేవ, ప్రేమలతో నిండిన జీవన విధానాన్ని అవలంబిస్తూ యేసు తన జీవితాన్ని ప్రజల మధ్యే గడిపారు. చిన్ననాటి నుంచే దేవుని చిత్తాన్ని అనుసరించడం, మానవాళికి మార్గదర్శనం చేయడం ఆయన లక్ష్యంగా మారింది. వయోజన దశలో ప్రజల ముందుకు వచ్చిన ఆయన, అహంకారం, స్వార్థం, ద్వేషంతో కూరుకుపోయిన సమాజానికి కొత్త దారిని చూపించారు. పేదలు, రోగులు, పాపులని సమాజం తృణీకరించిన వారిని సైతం ఆయన ఆప్యాయంగా ఆలింగనం చేసుకొని, వారిలోనూ దేవుని ప్రతిరూపాన్ని చూశారు. యేసు బోధనల కేంద్రబిందువు ప్రేమే. “నీ పొరుగువానిని నిన్ను నీవు ప్రేమించినట్లే ప్రేమించు” అనే సందేశం మానవ సంబంధాలకు పునాది లాంటిది. ప్రతీకారం కాకుండా క్షమను, ద్వేషానికి బదులు దయను, అహంకారానికి బదులు వినయాన్ని ఆయన ఉపదేశించారు. ఈ బోధనలు మాటల వరకే పరిమితం కాలేదు; తనను శిలువ వేసిన వారిని కూడా క్షమించిన ఆయన జీవితం, ఆయన చెప్పిన మాటలకు సజీవ సాక్ష్యం. అబద్ధం, దోపిడి, మోసపూరిత ఆచారాలపై ఆయన నిర్భయంగా ప్రశ్నలు లేపారు. నిజాయితీ, న్యాయం, కరుణ, సహనం లేని ఆధ్యాత్మికత వ్యర్థమని స్పష్టం చేశారు. భౌతిక సంపద తాత్కాలికమని, ఆత్మసంపదే శాశ్వతమని బోధించారు. యేసు జీవితం పరాకాష్ఠ శిలువపై త్యాగంలో కనిపిస్తుంది. అది ఓటమి కాదు; మానవాళికి అందించిన అత్యున్నత ప్రేమ సందేశం. ప్రేమ కోసం, సత్యం కోసం ప్రాణత్యాగం చేసిన ఆ ఘట్టం చరిత్రను మార్చింది. ఆయన పునరుత్థానం ఆశకు, విశ్వాసానికి, నూతన జీవనానికి ప్రతీకగా నిలిచింది. నేటి కలతలతో నిండిన ప్రపంచంలో యేసు బోధనలు మరింత అవసరం. ద్వేషం ఉన్న చోట ప్రేమను, విభేదాల మధ్య క్షమను, అంధకారంలో వెలుగును నాటే శక్తి ఆయన సందేశంలో ఉంది. యేసు జీవితం మనకు చివరిగా చెప్పేది ఒక్కటే—మనిషిగా ఉండటం, ఇతరుల కోసం జీవించడం, అదే నిజమైన దైవారాధన.