సాహసం చేయరా డింభకా! : - కవిరత్న – సాహిత్యధీర-సహస్రకవి భూషణ్ -పోలయ్య కూకట్‌పల్లి, -అత్తాపూర్, హైదరాబాద్

కృషి తెర

వెనుక దాగి 

వివాహమాడ  

విజయలక్ష్మి 

సిద్ధంగా ఉన్నదిరా..!  

శోకపు నీడల్లో దాగి

సుఖం నిదురిస్తున్నదిరా..!  

ఏదీ తనంతట తాను  

నీ దరికి రాదురా  

శోధించి సాధించాలి 

అదే ధీర గుణం 

అన్నారు మహాకవి శ్రీశ్రీ..!

ఔను 

విజయమైనా  

ఘన విజయమైనా 

అఖండ విజయమైనా  

అది మంత్ర తంత్రాల  

మాయాజాలం కాదు..!  

అది అతీంద్రియ శక్తుల  

ఆశీర్వాదం అసలే కాదు..!

అది నీ కసికి – కృషికి  

నీ గట్టి పట్టుదలకు

నీ అంకితభావానికి

నీ నిర్ణయాల నిశ్శబ్ద 

గంభీరతకు  

అందే వరప్రసాదం..!

నీ అకుంఠిత దీక్షకు 

నీ ఆలోచనల పదునుకు 

నీవు చూపే స్థితప్రజ్ఞతకు 

నీ బహుముఖ నైపుణ్యానికి  

పొందే ప్రతిఫలం...!

నీలోని నీతి – నిజాయితీకి,  

నీ నిర్మల నిశ్చల మనసుకు,  

నీవు పంచే నిష్కల్మష ప్రేమకు,  

ఈ సృష్టిలోని సకల జీవరాశులపై  

నీ సమదృష్టికి ఓ దివ్య దర్పణం.!

నీ నిద్రను, ఆరోగ్యాన్ని,  

సమయాన్ని వెచ్చించి  

నీవు కార్చే స్వేదబిందువులే  

నీ విజయానికి వజ్రకవచం..!

నీ సద్బుద్ధికి

నీ సత్ప్రవర్తనకు 

నీ సత్సంకల్పానికి 

నీ అలుపులేని ఆచరణకు...  

నీ సాహసానికి నీతత్వానికి 

నీ స్వచ్చమైన వ్యక్తిత్వానికి

నీలోని మచ్చలేని మానవత్వానికి  

ప్రతిఫలం నీవు ఆర్జించే 

అఖండ విజయం..!

అందుకై వెనకడుగు వేయక 

పట్టువదలని విక్రమార్కునిలా  

రామబాణంలా దూసుకుపోవాలి..!