పంచవర్ష స్వామి ఆలయం -సైకిల్ శిల్పం: - - యామిజాల జగదీశ్

 తిరుచ్చిలోని వొరైయూర్‌లో  పంచవర్ణస్వామి ఆలయం ఉంది! ఇది ఒక శివాలయం.
ఈ ఆలయం ఏడవ శతాబ్దంలో నిర్మితమైనట్లు చరిత్ర చెబుతోంది. ఇక్కడి ఓ రాతి స్తంభాన ఉన్న ఈ చిత్రం అందరి దృష్టినీ విశేషంగా ఆకర్షిస్తోంది. మన పూర్వీకులు దాదాపు 1300 సంవత్సరాల క్రితమే ఒక స్తంభంపై సైకిల్ చిత్రాన్ని చెక్కారు.
కానీ నిజానికి సైకిలుని దాదాపు 200 సంవత్సరాల క్రితం తయారు చేశారు. అది కూడా బ్రిటిష్ వారు కనుగొన్నట్లు చెబుతారు.
కానీ తమిళనాడులోని ఈ దేవాలయంలో వేల సంవత్సరాల క్రితమే మలచిన శిల్పాన్ని చూసినప్పుడు, అందరూ ఆశ్చర్యపోతుంటారు.
ఈ ఆలయంలో శివుడు ఐదు వేర్వేరు వర్ణాలలో కనిపిస్తాడని భక్తుల నమ్మిక. ఈ కారణం వల్లే ఇక్కడ ప్రధాన దేవతకు పంచవర్ణస్వామి అని పేరు వచ్చింది.
ఈ ఆలయానికి సంబంధించి చోళుల కాలం నాటి అనేక శాసనాలు ఉన్నాయి . ఈ ఆలయంలో ఉదయం 5:30 నుండి రాత్రి 8 గంటల వరకు వివిధ సమయాల్లో ఆరు రోజువారీ పూజలు చేస్తారు. మూడు వార్షిక ఉత్సవాలు ఉంటాయి. వార్షిక శ్రీవారి బ్రహ్మోత్సవం (ప్రధాన పండుగ). ఈ ఉత్సవాలకు లక్షలాది మంది భక్తులు తరలివస్తారు. ఈ ఆలయాన్ని తమిళనాడు ఛారిటబుల్ ఎండోమెంట్స్ విభాగం నిర్వహిస్తోంది.
ఈ ప్రదేశాన్ని వొరైయూర్ లేదా తిరుముక్కేశ్వరం అని పిలుస్తారు. ఇది ఒకప్పుడు చోళ రాజుల రాజధానిగా ఉండేది. దీనిని గ్రీకు యాత్రికుడు టోలెమి గుర్తించారు.  
హిందూ పురాణం ప్రకారం, శివుడు ఉదంక ఋషి కోసం ఐదు వేర్వేరు రంగులలో రోజులో ఐదు భాగాలలో కనిపించాడని నమ్ముతారు. ఈ ఆలయాన్ని "తిరుమూక్కీచ్చరం" అని కూడా పిలుస్తారు. తిరుజ్ఞానసంబంధర్ కృతి అయిన తేవారం ఈ ప్రదేశ ప్రస్తావన ఉంది. ఈ ఆలయంలో గరుడుడు, కశ్యప మహర్షి భార్య పూజలు చేశారు.
పంచవర్ణస్వామి ఆలయ సముదాయంలో మూడు ప్రాకారాలు (బయటి ప్రాంగణం), ఐదు అంతస్తుల రాజ గోపురం (ద్వార గోపురం) ఉన్నాయి. మధ్య మందిరం తూర్పు ముఖంగా ఉంది. గ్రానైట్ తో చేసిన లింగం రూపంలో పంచవర్ణస్వామి (శివుడు) ప్రతిమను దర్శించవచ్చు. గణేశుడు, కుమారస్వామి, నంది, నవగ్రహాల సన్నిధులు కూడా ఇక్కడ ఉన్నాయి. తమిళనాడులోని ఇతర శివాలయాలలోలా పంచవర్ణస్వామి గర్భగుడి చుట్టూ ఉన్న మొదటి ఆవరణ లేదా గోడలలో దక్షిణామూర్తి, దుర్గ, చండికేశ్వరుడు విగ్రహాలూ ఇక్కడ ఉన్నాయి. రెండవ ఆవరణ చుట్టూ గ్రానైట్ గోడలు ఉన్నాయి. 
ఈ ఆలయంలో ఎనిమిది చారిత్రక శాసనాలు ఉన్నాయి, వీటిని ఎపిగ్రఫీ ఇండియా 1907 నాటి 181-188గా నమోదు చేసింది. వాటిలో ఒకటి చోళ రాజు పాలన నాల్గవ సంవత్సరం నాటిది. 
ఈ ఆలయంతో సంబంధం ఉన్న పుగజ్ చోళ నాయనారుకి ఒక మందిరం ఉంది.
ఈ ఆలయం కావేరి నది ఒడ్డున నిర్మించిన ఆలయాలలో ఒకటి. 
ఇక్కడి పూజారులు శివుడిని సర్వోన్నత దేవుడిగా భావించే శైవ శాఖకు చెందినవారు.