అక్షరాకాశం :- — గుండ్లపల్లి రాజేంద్ర ప్రసాద్, భాగ్యనగరం

ఆకాశ దేశం – ఆశల రాజ్యం,

కలలు రాజులై రాజ్యం చేసే లోకం.

ఆకాశ దీపం – అంతరంగ కిరణం,

నిరాశ చీకటిని కరిగించే ప్రకాశం.

నీలి ఆకాశం – నమ్మకపు అంబరం,

భూమిపై పరుచుకున్న దేవతా వస్త్రం.

వెన్నెల ఆకాశం – మౌన సంగీతం,

ఒంటరితనాన్ని ఒడిసిపడేసే మాధుర్యం.

శూన్య ఆకాశం – మౌన మహాకావ్యం,

మన లోపలి శబ్దాల ప్రతిధ్వానం.

ఉదయ ఆకాశం – ఆశల సింధూరం,

ప్రతిరోజూ జీవితానికి కొత్త ప్రారంభం.

రంగుల ఆకాశం – కలల చిత్రపటం,

హరివిల్లు కరిగిన ప్రేమ లోకం.

ఎర్రని ఆకాశం – వీర పతాకం,

ధైర్యాన్ని నింపే సూర్య సందేశం.

అక్షర ఆకాశం – కవుల స్వర్గం,

కలం తాకితే పూలయ్యే పదప్రవాహం.

అందాల ఆకాశం – ఆనంద లోకం,

వీక్షకుల చూపుల్లో మెరిసే స్వర్గధామం.