బంధాలే నిజమైన సంపద: - సయ్యద్ సల్మా-📱7981914217-భద్రాచలం

బంధాలు పుట్టుకతోనే మనసుకు వేసే కవచాలు,

మొదటి కేకతోనే మన చుట్టూ విరిసే వెలుగులు.

జీవితపు పొడవైన యాత్రలో

అవి అడుగులకు అండగా నిలిచే నీడలు.

రక్త సంబంధాల మౌన గీతాల్లో

సంతోషాల హరివిల్లు మెరిసినప్పుడు,

“నీకై నేనూ — నాకై నీవూ” అన్న మాట

మనిషితనానికి శాసనమైంది.

కాలం క్రమంగా మారింది —

అనుబంధాలు తూకపు త్రాసుపై నిలబడ్డాయి,

ఆత్మీయత లెక్కల గీతల్లో చిక్కుకుంది,

సన్నిహితత్వం ఒప్పందాలుగా మారింది.

సంపదతో దగ్గరవే చిరునవ్వులు,

లేకపోతే దూరమయ్యే అడుగులు —

లాభనష్టాల గణనలో

మనసులు సంఖ్యలైపోయాయి.

అయినా —

రంగు కాగితాల మెరుపు క్షణికమే,

పదవుల ప్రతిష్ఠ గాలికి ఎగిరే దుమ్మే.

కాలం చెరిపేయలేని ఒకే అక్షరం —

మనసును తాకిన అనుబంధమే.

జీవిత సంధ్యవేళలో

వెనుదిరిగి చూసే వేళ

మనిషి వెతికేది ఆస్తి గదులు కాదు,

తన పక్కన నడిచిన మనసుల జాడ.

అందుకే —

స్వార్థం నీడలా చేరినా హృదయం చల్లారకూడదు,

లెక్కల మధ్య ప్రేమ లయపడకూడదు.

ఈరోజు పలికిన మృదువైన మాట

రేపటి బంధానికి మూలవేరవుతుంది.

బంధాలే నిజమైన సంపద —

మిగతావన్నీ కాల ప్రవాహంలో తేలే ఆకులే.

ఒక చిరునవ్వు దూరాలను కరిగించగలదు,

ఒక ఆప్యాయత విరిగిన మనసును జతచేయగలదు.

మనసు గెలుచుకున్న క్షణమే శాశ్వత విజయం,

మిగిలినది కాలం రాసి చెరిపే తాత్కాలిక గాథ మాత్రమే.