వేగానికి కళ్లెం: - డా.చీదెళ్ళ సీతాలక్ష్మి-విశ్రాంత సహాయాచార్యులు-హైదరాబాద్

అన్నీ మనమంచికే

ఒక్కోసారి అనుకున్నదొకటి

జరిగేది మరొకటి

ఇంట్లోనే కడప ముందు

పట్టా మీద కాలు పడి

జర్రున జారింది

పాదం మడత పడ్డది

ఓ అంటూ అరుపు

పక్కనే ఉన్న భర్త 

వురుకొచ్చుడు

ఏం జరిగింది అనే లోపే 

కింద లేవలేక ఉన్న నన్ను చూసి

బిత్తరపోవుడు

అబ్బ నొప్పి  నొప్పి

కెవ్వు కేక

లేవలేను

మెల్లగా లేపిండు

అట్లనే ఒంటి కాలు మోపి 

ఇంకో కాలు బాధగా

నా తోడుకు ఏమైంది

బెదరిపోయింది

నా మీదనే పడింది పని

ఒక కాలు వాచిపోయింది

తక్కువయితదిలే అనుకుంటే

నొప్పి ఎక్కువై వాపు పెరిగింది

మెడికేర్ లో  వెంకటేశ్వర రెడ్డి

చూసుడు చిట్టి రాసుడు

ఎక్సరే తీసుడు

నల్ల షీట్ లో తెల్లగా మెరుస్తూ

ఎడమ పక్క బొక్క విరిగిందని చెప్పుడు

సిమెంట్ పట్టి ఎదురుచూపులు

నన్ను చుడుతరు అనుకొని సంబరం

తెల్లని పట్టి మీద నీలం బట్ట చుట్టుడు

వైద్యుడు మూడు వారాలు కదిలిచ్చద్దు అని చెప్పుడు

తిరిగే కాలుకు విశ్రాంతి

నడకకు శాంతి

నాతోడు నీడ అన్నీ ఆయనే

దగ్గరుండి చూసుకొనుడు

వంట తంటా అంతా 

నాది ఒంటి కాలు పోరాటం

ఆయనది ఒంటరి పోరాటం

నా చేతులకు

నా చేతలకు విశ్రాంతి

ఎన్నెనో కార్యక్రమాలు

మూగపోయి బాధగా

వింతగా చూస్తున్నాయి

స్నేహితులు లేడి పిల్లలగా గంతులేసి తిరుగుతరు

ఇప్పుడు ఇట్లా అని బాధపడుడు

నాకు కొంత ఊరట

నా వెనుక కొంత బలగం ఉంది

ఓదార్పు నిచ్చేంత 

అదే నాకు మనసు తేలికైన వింత

తొలగును చింత!!

విధిరాత తప్పదు ఏరికైనా

మనం ఎంత గొప్పవాళ్లనుకున్నా

కర్మ బలీయం అనుభవించాల్సిందే తప్పదు

కాలానికి తల వంచాల్సిందే

కాలుకే విశ్రాంతి కానీ

మనసుకు కాదు కదా

ఆలోచనలు అనంతం

ఏది ఎప్పుడు ఎట్లా జరుగునో

జరగక మానదు

అనుభవించడమే మనిషి నైజం!!

కాలికి గాయం

వేగానికి కళ్లెం!!

--------------------