చిరుభావాల చిరుచిట్టా: - - గుండ్లపల్లి రాజేంద్రప్రసాద్, భాగ్యనగరం

చిరునవ్వులు చిందుతా — 

మనసుల ముంగిట పూలవుతా,

మాటలకన్నా ముందే

హృదయాలను చేరుతా.

చిరువెన్నెల చల్లుతా —

నిశ్శబ్దానికి వెలుగవుతా,

చీకటి కళ్లకు

కలల దీపమవుతా.

చిరుగాలులు వీస్తా —

అలసిన ఊపిరికి ఊరటనిస్తా,

భారం మోసే హృదయానికి

సేద తీర్చుతా.

చిరుదివ్వెలు వెలిగిస్తా —

ఆశల అంచుల్ని తాకుతా,

చిన్న వెలుగే పెద్ద దారిని

చూపుతుందని చెబుతా.

చిరుజల్లులు చల్లుతా —

ఎండిన కలల్ని తడుపుతా,

చిన్నచిన్న బిందువులే

సముద్రమవుతాయని గుర్తుచేస్తా.

చిరుగజ్జెలు కట్టుకుంటా —

కాలంతో తాళం వేస్తా,

నడకలోనే లయను నింపి

నాట్యం చేస్తా.

చిరుపూజలు చేస్తా —

మనసే గర్భగుడిగా చేసుకొని,

నిజాయితీనే

నైవేద్యముగా అర్పించుకుంటా.

చిరుకోరికెలు కోరుతా —

అతి ఆశలు లేకుండా,

సంతృప్తే

సర్వస్వమని తెలుపుతా.

చిరుకోపాలు చూపుతా —

ప్రేమకు సరిహద్దులు గీస్తా,

మౌనమే

బోధకుడవుతుందని నేర్పుతా.

చిరుచివాట్లు పెడతా —

నోరును మూయిస్తా,

కాళ్లబేరానికి తెచ్చుకుంటా,

చెప్పినట్లు చేయించుకుంటా.

చిరుతగవులకు దిగుతా —

అలకపానుపు ఎక్కుతా,

బెదిరించి లొంగదీసుకుంటా,

చెప్పుచేతల్లో పెట్టుకుంటా.

చిరుకవితలు అల్లుతా —

ఈ చిన్నచిన్న క్షణాలతోనే,

జీవితం అనే

మహాకావ్యాన్ని కూర్చుతా.

చిరుక్షణాలు తలచుకో

చిరుప్రాయాన్ని గుర్తించుకో

చిరుమూటలు కట్టుకో

చిరుభావాలు వెల్లడించు.

చిరుచిట్కాలు పాటించు

చిరుకార్యాలు చేసెయ్యి

చిరువిజయాలు సాధించు

చిరుపతకాలు గెలుచుకో.