జీవితం బంగారం: - గుండ్లపల్లి రాజేంద్రప్రసాద్, భాగ్యనగరం

ఇల్లే బంగారం —

అమ్మ మమకారపు ముద్దుల గూడు

నాన్న నడకల నిశ్శబ్ద నిబంధన

గోడలమధ్య కాదు హృదయాలమధ్య నిలిచిన సంపద.

వళ్ళే బంగారం —

శ్రమ చిందిన చెమట చుక్కల్లో

కాలానికి ఎదురుగా నిలిచిన కాళ్లలో

వయసు ముద్రలు వేసినా విలువ తగ్గని జీవనరత్నం.

చూపులే బంగారం —

మాటలకన్నా ముందే పలికే భావాలు

నిశ్శబ్దంలోనూ అర్థం చెప్పే కళ్ల భాష

ఒక్క చూపుతోనే వెయ్యి వాక్యాలు వెలిగించే వెలుగు.

పలుకులే బంగారం —

పలకరింపులో పరిమళం

ఆశీర్వాదంలో అమృతం

గాయాన్ని మాన్పే మాట గుండెల్ని కట్టే గంధం.

దొరికిన బంగారం —

అనుకోని వేళ అందిన స్నేహం

అవసరంలో దొరికిన చెయ్యి

అదృష్టమని పిలిచినా దైవం పంపిన వరం.

దొంగ బంగారం —

మెరిసి మోసం చేసే ముఖాలు

బయట బంగారం… లోపల బూడిద

కనుల్ని మభ్యపెట్టినా మనసును కాల్చే నకిలీ కాంతి.

మనసే బంగారం —

క్షమించే గుణం ఉన్నప్పుడు

పంచే ప్రేమ పొంగినప్పుడు

కలుషం తాకని హృదయం కాలానికీ తraగని ఖజానా.

అక్షరాలే బంగారం —

అనుభవం అరిగించిన అక్షరాలు

ఆలోచనకు ఆకారం ఇచ్చిన పదాలు

కవితగా కరిగిన భావం తరతరాలకు మిగిలే ధనం.

బంగారం తూకంతో కాదు — బంధంతో కొలవాలి

మెరుపుతో కాదు — మనసు వెలుగుతో తేల్చాలి

ఎందుకంటే…మనిషే బంగారం

మనసుంటే… జీవితం బంగారం!

.