కలిసేది నదులన్నీ కడలిలోనే...!!: - కవి రత్న-సాహిత్య ధీర-సహస్ర కవి భూషణ్-పోలయ్య కూకట్లపల్లి-అత్తాపూర్ హైదరాబాద్

మిత్రమా..! ఓ నా ప్రియ నేస్తమా..!!

నీవు కొన్న నీ జేబులో ఉన్న

టిక్కెట్ కు విలువ నీ గమ్యం వరకే

గమ్యం చేరాక అదొక చిత్తుకాగితమే... 

నిరుపయోగమే.....నిస్ప్రయోజనమే...

నిజమే ఈ జీవితం సైతం

ఒక నిరంతర ప్రయాణమే...

ఈ జీవితం ఒక నదీ ప్రవాహమే...

ప్రతి నది కదిలి...కదిలి...

కడకు కలిసి పోవాల్సింది కడలిలోనే...

ఓ మిత్రమా..! నా ప్రియ నేస్తమా..!!

ఈలోగా తాను

ప్రయాణించిన దూరం

ప్రయాణించినంత కాలం

బంజరు నేలల్లో బంగారు పండేలా

కర్షకుల కడుపు నిండేలా

కష్టం ఫలించేలా...

నిశ్చలంగా నిస్వార్ధంగా...

నిర్మలంగా నిర్విరామంగా ...

ప్రవహిస్తోంది ప్రతినది..ఫలభరితంగా...

మిత్రమా..! ఓ నా ప్రియ నేస్తమా..!!

ఫలించు ఫలించు...పచ్చని చెట్టులా

విహరించు విహరించు...వీచే గాలిలా

పరిమళించు... పరిమళించు...

పూచే పువ్వులా 

విరజిమ్ము...విరజిమ్ము

వెన్నెల వెలుగుల్ని ఆరని దీపంలా...

 

మిత్రమా..! ఓ నా ప్రియ నేస్తమా..!!

నిద్రపోకు నిద్రపోకు...కుంభకర్ణునిలా...

పెట్టకు పెట్టకు...గురకలు

గూటిలోని గుడ్లగూబలా...

గదిలో గాఢాంధకారంలో గబ్బిలంలా...

ఓ మిత్రమా..! నా ప్రియ నేస్తమా..!!

కలమై...

కాగితమై...

కవిత్వమై...

కావ్య ఖండికవై...

కదిలించు...కరిగించు.. 

ప్రతి పాషాణ హృదయాన్ని...

ఓదార్చు ఓదార్చు ప్రతి కన్నీటి బ్రతుకును

వెలిగించు వెలిగించు ప్రతి చీకటిజీవితాన్ని

మిత్రమా..! ఓ నా ప్రియ నేస్తమా..!!

మిగిల్చాలి...మిగిల్చాలి

నీ జీవితం ముగిసేలోగా

చెరగని కాలానికి కరగని ముద్రలు కొన్ని

మిగిలిపోవాలి నీవు చరిత్రలో..చిరంజీవిగా