మురిసే తీపి జ్ఞాపకం: - డా.చీదెళ్ళ సీతాలక్ష్మి-M.A,M. Phil., Ph.d-విశ్రాంత సహయాచార్యులు-హైదరాబాద్-9490367383

తొలి పరిచయం

భూమిని ముద్దాడే తొలిసంతకం

అప్పుడే ఉదయించి

రెండాకులు తొంగి చూచి

రవికిరణాల స్పర్శతో నవ్వుతూ

అలరారే పచ్చని జాతి

ఎదిగి పరోపకారంలో మునిగిన నైజం!!

అమ్మ కడుపునుండి వెలువడ్డ బిడ్డ

పుడమిపై వెలసిన తొలిపరిచయం

తెరవని కళ్ళు

మెరిసిన ఒళ్ళు

మురిసిన తల్లి

ముద్దాడిన క్షణం

మాధుర్య రసానందం!!

చూపులతో కలిసిన తొలి పరిచయం

మాటమాట జతగూడిన వైనం

ప్రేమికుల గమనానికి చిహ్నం

మరుపురాని అనుభూతుల ధాన్యం

అదే జీవితానికి పరమార్థం

తొలిపరిచయం ఎప్పుడు మధురమే

అయ్యావు తొలిపరిచయం

పెట్టావు మదిలో గిలిగిలి

చేశావు తొలి సంతకం

మాయని మమతల గీతం

మార్చేశావు జీవన పథం

నేర్పావు బ్రతుకు పాఠం

ఉండాలి మరి జీవితాంతం

భవిష్యత్ కారాదు ప్రశ్నార్థకం!!

---------------------------