"మాకేది ఉగాది మాదంతా మనాది" - అంకాల సోమయ్య -దేవరుప్పుల-జనగామ-9640748497

మాకేది ఉగాది 

మాదంతా మనాది 

రాశీ ఫలాలు నమ్ముకుంటే

మేము రాశికి రాము

రంగానికి రాము

ధనికుడు మరింత ధనికుడుగా

పేదోడుమరింత నిరుపేదౌతుంటే

నాల్గింట మూడొంతులు పైబడి మోసకారులు

దగా మోసం కుట్ర కుతంత్రాన్నే

రాజ్యనీతిగా మలచుకుంటే

మాకేది ఉగాది 

మాదంతా మనాది 

చిన్న చిన్న మండల స్థాయిల్లో కూడా డీమార్ట్ మోర్ లాంటి స్టోర్స్ఏర్పాట్లతో 

ఉప్పులు పప్పులు కారుచౌకగా అమ్ముతుంటే చిన్నకిరాణాకొట్టులెలానడిపేది

ఆకలి చావడం తప్పా

మాకేది ఉగాది 

మాదంతా మనాది 

చేనేత వస్త్రాలకన్నా

మిల్లు వస్త్రాలు సరసమైన ధరలకే విక్రయిస్తుంటే

నేతన్నకు ఉరితాడే

బ్రతకలేక వల్లకాడే

మాకేది ఉగాది 

మాదంతా మనాది 

చిన్న పెద్ద నగరాల్లో  జ్యూవెలరీ షాపులు 

జాయలూకాస్ పెరల్స్ డైమండ్స్ అంటూ 

కార్పోరేట్ బంగారం దుకాణాలు తెరుస్తుంటే

ఇక కంసాలీలెలా బ్రతికేది?!

ఆకలిని జయించలేక ఏ నుయ్యో గొయ్యో చూసుకోవడం తప్పా

మాకేది ఉగాది 

మాదంతా మనాది 

ప్రభుత్వ ఉద్యోగ నోటిఫికేషన్లు లేకా 

అర్హతగలనిరుద్యోగులు ప్రైవేటు విద్యా సంస్థలు పెడితే 

కన్నుకుట్టిన కార్పోరేట్ సంస్థలు 

హంగుహార్భాటాలతో ఇంటర్నేషనల్ స్కూల్లు తెరిస్తే

ఉన్న ప్రైవేటు స్కూల్లు మూతబడి రోడ్డున పడితే చిన్న కాన్వెంట్ స్కూల్ యాజమాన్యాలు ఎలా బ్రతికేది 

మాకేది ఉగాది 

మాదంతా మనాది 

యాంత్రిక వ్యవసాయంతో

అరకపశువులు ఉండి పని నైపుణ్యం గల వ్యవసాయం కార్మికులు 

పనికల్పించేనాథుడులేక ఉన్న పశువులను అమ్ముకొని ఉప్పరిపనికిపోతుంటే

మాకేది ఉగాది 

మాదంతా మనాది 

పెట్టుబడిదారులకనుసన్నల్లో ఏలికలు పాలనకొనసాగిస్తుంటే?!

ప్రజాస్వామ్యంకాస్త

నియంతృత్వమౌతుంటే?!

అమ్మబోతే అడవి

కొనబోతే కొరివి అన్నచందమాయే 

మా బ్రతుకులు 

మా కేది ఉగాది 

మాదంతా మనాది 

దగా పడ్డోళ్ళమంతా సోయి కొచ్చినం

ఇక చాలు ఈ అవమానాలు 

ముందొచ్చే శ్రీపరాభవంతో 

మా ప్రాభవానికి శ్రీకారం చుడదాము

ఇక మా బ్రతుకంతా ఉగాదే 

మాకు ఉండదులే ఏ మనాది

--------------------------------------