ఇక్కడో చెట్టుండేది...: - డా.టి.రాధాకృష్ణమాచార్యులు-9849305871

మతిమరుపు నటన లేని మిత భాషి

యాది మరువని బుర్రల సున్నిత ఆలోచన 

పసితనం తీపి మాటల పరామర్శ తెరపై

కండ్లు మసకమసక 

వొళంతా నలిగిన దేహం ముడుతలు 

ఆశ్చర్యంలోనో దుఃఖంలోనో నొసలు ఎగిరిన ముఖం

ప్రశాంతత కరువైన యాతన

నాకంటే ముందే మా ఇంటిముందు 

పచ్చని చెట్టు నీడ పరిచింది 

అమ్మ చెప్పింది గోముగా 

ప్రకృతి స్నహం చిరునామా 

వెచ్చగ చల్లగ పూసి కాసిన వేళ్లు 

పచ్చగా బతికిన వాకిలిలో వీస్తున్న

గాలి పలకరింతల పులకింత 

నాతోనే సమకాలీన మైత్రి అలుముకున్న చేతులు

నింగీనేలను కలిపిన అలలతేలే పవనం

లాలించిన గుర్తు ఒకటి

వాలిన భుజాన తేనేటీగలా ఝుమ్మంది

గత జన్మల అమ్మ ఋణంలా...

తవ్విచూస్తే తెలిసింది నాలో అన్ని 

కిటికీలు తెరుచుకొన్న నిన్న

ఒక చెట్టు ఇక్కడే నాతో, 

ఆ నీడలో నేను చెట్టంతైన సంగతి...

ఇక్కడో చెట్టుండేదనే 

సుందర దృశ్యం నిజమైన బతుకు గీత!

నన్ను విడిచిన కాలం ఆనవాలుగా

 ఇక్కడో చిన్న మొక్కను నాటా

నా కళ్ళ అద్భుత మెరుపు

రెప్ప తెరిచిన ఆ చెట్టు బతుకు రంగుల ఇంద్రధనుస్సు 

ఆకాశం వంగిన తలతో చెట్టు ఆకులను 

నిమరడమే కొస మెరుపు కొత్త మొలక