ఏం మనుషులు?: - గుర్రాల లక్ష్మారెడ్డి కవి రచయిత- సెల్.9491387977. కల్వకుర్తి నాగర్ కర్నూల్ జిల్లా తెలంగాణ.

ఏం మనుషులు వీరివి ఏం మనసులు

చెడ్డ పనులు చేసేటి దొడ్డ మనుషులు

వీరు ఎంత చెప్పినా అసలు వినరు

వారు ఏమాత్రం సిసలైన దారిని కనరు !

ఏం మనుషులు వీరివి ఏం మనసులు

తెగ కోతలు కోసేటి ఈ కోతి మనుషులు

కొంపకు నిప్పు పెట్టి చుట్టలు ముట్టిస్తరు

చంపకు చుక్కెట్టి జేబులు కొట్టేస్తరు !

ఏం మనుషులు వీరివి ఏం మనసులు

ఓట్ల సీట్లకై పోటీ చేయు పోకిరి మనుషులు

నెట్ల గట్ల గుండా నోట్లు పంచుతుంటరు

గెలిచిన పిమ్మట వారు కోట్లు దండుకుంటరు !

ఏం మనుషులు వీరివి ఏం మనసులు

లాయర్లైన కొందరు లయైరు మనుషులు

కోర్టులో అన్యాయానికి హాజరు వేస్తుంటరు

రికార్డుగా న్యాయంకై గైర్హాజరు మోస్తుంటరు !

ఏం మనుషులు వీరివి ఏం మనసులు

రౌడీలైనా కొందరు దౌర్జన్యం మనుషులు

మానవత్వాన్ని మంట కలుపుతున్నరు

దానవత్వాన్ని వారు ఇంట నిలుపుతున్నరు !