మాయమైపోయిన మధుర స్మృతులు.....!!: - -యెనుముల వేణుగోపాలరావు - అమలాపురం.

ఏవీ , ఆ..గతస్మృతుల

ఖజానాలు...!

ఎక్కడ, ఎంత వెదికినా, 

కనిపించవేమిటి ?

ఆనాటి అనుబంధాలు ,ఆత్మీయతలు ,

ప్రేమపూర్వకమైన పలకరింపులు ,

బంధువులుతో కళకళలాడే లోగిళ్ళు ,

రంగవల్లులతో స్వాగతం పలికిన 

విశాలమైన వాకిళ్ళు !

ఏవీ..ఆనాటి జ్ఞాపకాలు,

మల్లె పువ్వు కన్నా _

స్వచ్చమైన మనసులు ,

త్యాగము తప్ప స్వార్థం లేని మనస్తత్వాలు !

ఏవీ, ఎక్కడ,ఆ..అనుభూతులు,

ఆరు భయట హాయిగా 

నిద్ర పోయిన రాత్రులు ,

వీధి అరుగు పై కూర్చుని మాట్లాడుకున్న మంచి,చెడ్డలు !

బామ్మలు చెప్పిన రామాయణ, భాగవత కథలు,

తాతయ్య చెప్పిన 

సామెతలు ,పొడుపు కథలు ,

పెద్దలు బోధించిన నీతి సూత్రాలు!

ఏవీ..నాటి తీపి గుర్తులు,

ఆదివారం , వీధి అరుగు పై, కూర్చునివిన్న  _

ఆకాశవాణి నాటకాలు,

అందరినీ అక్కున చేర్చుకునే 

విశాల హృదయాలు !

 ఏవీ, ఎక్కడ.....

కల్మషం లేని మనసులు - 

ప్రేమను పంచే మమతలు !

తెల్లవారుఝామున కూసే 

కోడి కూతలు ,

ఇసుక తిన్నె పైన వ్రాసిన 

చేతి రాతులు,

మనసుకు ఆహ్లాదం కలిగించే 

హరికథలు, బుర్రకథలు, 

తోలు బొమ్మలాటలు ,

చెవులకు వీనులవిందైన 

అర్థవంతమైన గీతాలు ,

కథా బలంతో గుండెను బరువెక్కించే 

చలన చిత్రాలు!

ఏవీ, ఎక్కడ ...

బావా మరదళ్ల మోటు సరసాలు ,

బావమరిది_ బావ గారితో ఆడే 

వేళా కోలా లు...

యువతను ఉర్రూతలూగించిన 

భోగం మేళాలు,

జాతరలో మ్రోగించిన 

భాజా భజంత్రీలు!

తల్లిదండ్రుల ప్రేమలే 

ఆస్తిగా భావించే నాటి తరాలు 

  ఏవీ ఎక్కడ......!?

                ***