పలకరా! (గజల్ - ఖండగతి): - గుండ్లపల్లి రాజేంద్రప్రసాద్, భాగ్యనగరం

మాటలా మూటవై ముద్దుగా పలకరా│

ఊహలా ఊటవై ఊపుగా పలకరా॥

చూపులా చినుకులా చిలిపిగా పలకరా│

నవ్వులా పువ్వులా చక్కగా పలకరా॥

గాలిలో గంధమై గానమై పలకరా │

గుండెలో రాగమై తియ్యగా పలకరా॥

మధుమాస మల్లెలా మృదువుగా పలకరా │

మధురిమల ముచ్చట్ల జలధిగా పలకరా॥

పున్నమీ జాబిలీ వేళలో పలకరా │

విరహమూ రేపగా ప్రేమగా పలకరా॥

స్వప్నాల సంద్రమై చల్లగా పలకరా │

స్పర్శలా సుధలతో చురుకుగా పలకరా॥

రాజేంద్ర హృదయపు గీతమై పలకరా │

రాగమై కవితలా రాజుగా పలకరా॥