కలాల గళాలు: - గుండ్లపల్లి రాజేంద్రప్రసాద్, భాగ్యనగరం.

కలాలు కదులుతున్నాయి —

కాలపు గుండెలో కొట్టుకునే స్పందనల్లా 

నిశ్శబ్దానికి నడక నేర్పే

నిజాల అడుగుల్లా ముందుకూ మున్ముందుకూ।

కలాలు కారుస్తున్నాయి —

మనసులో మిగిలిన మధుర వేదనలను

మాటల్లో మలచి జార్చే

మంచి ముత్యాల్లా మిలమిలా తళతళా।

కలాలు చెక్కుతున్నాయి —

అనుభవాల రాతిబండలపై

అక్షరాల శిల్పాల్ని మలిచి

జీవితాల్ని జ్ఞాపకంగా తియ్యగా తిన్నగా।

కలాలు గీస్తున్నాయి —

కలల కాన్వాసులపై

ఆలోచనల రంగులతో

అందమైన లోకాలను భావాల్లా బొమ్మల్లా।

కలాలు కోరుతున్నాయి —

సత్యం కోసం, సమానత్వం కోసం

మౌన గుండెల స్వరాన్ని వినిపించేందుకు

న్యాయాన్ని నిలబెట్టేందుకు నీతినీ నిజాయితీనీ।

కలాలు కక్కుతున్నాయి —

అన్యాయం మీద ఆగ్రహాన్ని

అసత్యంపై ఆవేశాన్ని

అక్షరాగ్నిలా రవ్వలు చెరుగుతూ చిమ్ముతూ।

కలాలు…

మేధావుల చేతిలో మహత్తర సాధనాలు —

మనసు మాట్లాడే మాధ్యమాలు 

మానవత్వం మేల్కొలిపే మహామంత్రాలు।

కలాలు కమ్మని కవితలు కూర్చితే —

కేవలం పదాలనే కాదు

ప్రపంచాన్ని మార్చగలవు 

హృదయాలను ఉప్పొంగించగలవు॥