బైబిల్‌లోని ఉపమాన కథలు; -సి.హెచ్.ప్రతాప్

 బైబిల్‌లోని ఉపమాన కథలు అత్యున్నత ఆధ్యాత్మిక సత్యాలను సామాన్యులకు సైతం సులభంగా అవగతమయ్యేలా బోధించే అద్భుత సాధనాలు. లోక రక్షకుడైన యేసు క్రీస్తు తన దివ్య సందేశాన్ని జనబాహుళ్యానికి చేరవేయడానికి ఈ ఉపమాన శైలిని ప్రధానంగా ఎంచుకున్నారు. నిత్య జీవితంలో మనం చూసే సాధారణ సంఘటనలను, పరిసరాలను ఉదాహరణలుగా తీసుకుని, వాటి వెనుక ఉన్న గంభీరమైన నైతిక విలువలను ఆయన ఆవిష్కరించారు. అందుకే ఈ కథలు శతాబ్దాలు గడిచినా నేటికీ ప్రతి వయస్సు వారికి స్ఫూర్తినిస్తూ, హృదయాలను హత్తుకుంటూనే ఉన్నాయి. ఇవి కేవలం కథలు మాత్రమే కావు, మనిషి అంతరాత్మను మేల్కొలిపే దివ్య వాక్కులు.
యేసు బోధించిన ఉపమానాల్లో “మంచి సమరయుడు” కథ అత్యంత ప్రాచుర్యం పొందింది. దొంగల చేతిలో గాయపడి, రక్తపు మడుగులో ప్రాణాపాయ స్థితిలో ఉన్న ఒక బాధితుడిని చూసి నాటి సమాజంలో గొప్పవారనిపించుకున్న వారు కూడా ముఖం చాటేసి వెళ్ళిపోయారు. కానీ, అట్టడుగు వర్గానికి చెందిన వ్యక్తిగా పరిగణించబడే ఒక సమరయుడు మాత్రం ఆ బాధితునిపై కనికరముంచి, అతనికి పరిచర్య చేసి ప్రాణదానం చేశాడు. ఈ కథ ద్వారా సహాయం చేసే గుణం అనేది కుల, మత, జాతి విభేదాలకు అతీతమని స్పష్టమవుతుంది. ఆపదలో ఉన్న ప్రతి ఒక్కరూ మన పొరుగువారేనని, వారిని ప్రేమించి ఆదుకోవడమే నిజమైన మానవత్వమని ఈ ఉపమానం మనకు దిశానిర్దేశం చేస్తుంది. స్వార్థాన్ని వీడి పరోపకారార్థం జీవించడమే దైవానికి అత్యంత ప్రీతికరమైన కార్యమని ఇది చాటిచెపుతుంది.
మరో హృద్యమైన ఉపమానం “తప్పిపోయిన కుమారుడు”. తండ్రి ఆస్తిలో తన వాటాను అడిగి తీసుకుని, దూర దేశాలకు వెళ్లి భోగవిలాసాలతో సర్వస్వాన్ని కోల్పోయిన ఒక కుమారుడు, చివరికి తన తప్పును తెలుసుకుని పశ్చాత్తాపంతో ఇంటికి తిరిగి వస్తాడు. కొడుకు చేసిన తప్పులను ఎత్తిచూపకుండా, తండ్రి అతన్ని ప్రేమతో కౌగిలించుకుని గొప్ప విందు ఏర్పాటు చేస్తాడు. ఈ కథ మనకు దైవికమైన క్షమను, అనంతమైన ప్రేమను పరిచయం చేస్తుంది. మనిషి ఎంతటి పొరపాటు చేసినా, నిజాయితీగా పశ్చాత్తాపపడి తిరిగి వస్తే క్షమించి అక్కున చేర్చుకోవాలనే గొప్ప సందేశం ఇందులో ఉంది. ద్వేషం కంటే క్షమ గొప్పదని, శిక్షించడం కంటే ప్రేమించడం మిన్న అని ఈ ఉపమానం బోధిస్తుంది.
అలాగే “విత్తనాలు చల్లిన రైతు” ఉపమానం మనిషి వ్యక్తిత్వానికి అద్దం పడుతుంది. రైతు చల్లిన విత్తనాలు దారి పక్కన, రాతి నేల మీద, ముళ్ళ పొదల్లో మరియు మంచి నేలలో పడతాయి. కేవలం మంచి నేలలో పడిన విత్తనాలు మాత్రమే మొలకెత్తి సమృద్ధిగా ఫలిస్తాయి. ఇక్కడ నేల అనేది మన హృదయానికి ప్రతీక. మన హృదయం మంచి ఆలోచనలకు, ఉన్నతమైన విలువలకు లోబడి ఉంటేనే మన జీవితం సార్థకమవుతుంది. మన మనస్సు ఎంత నిర్మలంగా ఉంటే మన ప్రవర్తన అంత ఉత్తమంగా ఉంటుందని ఈ ఉపమానం హెచ్చరిస్తుంది. కేవలం వినడం మాత్రమే కాదు, వినిన దానిని ఆచరణలో పెట్టడమే ప్రధానమని ఇది గుర్తు చేస్తుంది.
బైబిల్‌లోని ఈ ఉపమాన కథలన్నీ మానవ జీవన యానానికి దివ్యజ్యోతులు. ఇవి మనిషిలో వినయాన్ని, సేవా దృక్పథాన్ని,  సహనాన్ని పెంపొందిస్తాయి. నేటి యాంత్రిక జీవనంలో నైతిక విలువల క్షీణతను అరికట్టడానికి ఈ బోధనలు ఎంతో అవసరం. సమాజంలో శాంతియుత వాతావరణం నెలకొనాలంటే మనం ఒకరినొకరు క్షమించుకోవాలి, ప్రేమించుకోవాలి మరియు పరస్పరం సహాయం చేసుకోవాలి. అప్పుడే మనిషిలోని దైవత్వం మేల్కొంటుంది. క్రీస్తు అందించిన ఈ ఉపమాన సందేశాలను ప్రతి ఒక్కరూ తమ జీవితంలో అంతర్భాగం చేసుకుంటే, లోకం మొత్తం ఒక సుందర నందనవనంగా మారుతుంది.
యేసు క్రీస్తు ఒక సందర్భంలో ఇలా అన్నారు "చెవి గలవాడు వినును గాక."