పోరే!: - డా. పివిఎల్ సుబ్బారావు, విజయనగరం, 9441058797.

1.

అమ్మ గర్భంలోనే ఆరంభం,

 బయటకు రావాలని! 

వచ్చిన దగ్గర నుండి, 

సమారంభం ఎలా బతకాలని! 

ఎవ్వరూ స్వాతంత్రం ఇవ్వరు,

 నీవే సాధించుకోవాలని! 

మార్గం వేసి ఉండదు,

 నడిచే దారి నిర్మించాలని! 

నడవనివ్వక వెనక్కి ,

లాగే వాళ్లని ,తోసి రాజనలాని!

2.

పగలు రాత్రి అనక ,

విరామం,లేని సముద్ర హోరు!

ఎదురుగా ఉదయించే ,

సహస్రకిరణాల సూర్యుడితీరు!

నింగి నుండి ,కుండ పోతై,

 కురిసే చినుకుల జోరు!

తెల్లవారగనే కూడు కోసం,

 ఎగిరే ఆ పక్షుల బారు!

సాగరం చేరే దాకా,నదీ,

 ప్రవాహ పరవళ్ల చైతన్య సౌరు;

3.

అనుకున్నది పొందాలంటే,

 అహర్నిశలూ జ్వలించాలి! 

సింహానివే ,ఏది గుహదగ్గరికి, 

రాదు, బయటకొచ్చి వేటాడాలి! 

విజేయుడివే ,విషాదం వీడు, 

విల్లు చేపట్టి, ధర్మం నిలబెట్టాలి;

నిన్ను నిరూపించుకోవాలంటే,

ముందుకు ఊరికే తీరాలి !

జీవనం పోరాటం, తెగింపు,

 కావాలి ,సంకెళ్లు తెగాలి! 

4.

ఓ పార్ధుడా, యోధుడా, క్షుద్రం,

   హృదయ దౌర్బల్యం, తెలియాలి!

పోరాటంలో గెలిచావు, ఇంకేమి,

ఆశయ సిద్ధి, ఆయువృద్ది! 

మరణించావు, వచ్చేది విశేషకీర్తి,

ఇచ్చేది భావితరాలకు స్ఫూర్తి!

నీవు మరణించినా ,సిద్ధాంతం ,

బతకాలి, మార్గాలు జీవించాలి!

అస్తవ్యస్త సమాజాన, పోరాటమే,  సమవర్తి,న్యాయమూర్తి!

_________